Livan Prezidenti Jozef Aun İsrail ilə birbaşa danışıqlar seçiminə görə “Hizbullah” tərəfindən ona qarşı başlanılan tənqid və “xəyanət” kampaniyasına sərt cavab verib. Prezident vurğulayıb ki, “bizim etdiklərimiz xəyanət deyil, əksinə, əsl xəyanəti öz ölkəsini xarici maraqlar naminə müharibəyə sürükləyənlər törədir”.
ArabAZ xəbər verir ki, Jozef Aun danışıqlara getmək qərarının ölkəni qorumaq məqsədi daşıdığını xüsusi qeyd edib. O, Livan xalqının, xüsusilə də cənub bölgəsində yaşayanların milli mənafelərə xidmət etməyən münaqişələrin bədəlini ödəməyə davam etməsini qətiyyətlə rədd edib. Prezident həmçinin “Hizbullah”a xitabən ritorik sual ünvanlayaraq, müharibə qərarının nə vaxtsa milli konsensus (ümumi razılıq) yolu ilə qəbul edilib-edilmədiyini soruşub.
Aunun bu kəskin mövqeyi “Hizbullah”ın baş katibi Naim Qasımın İsrail ilə birbaşa danışıqları rədd edən və onun nəticələrini “yox sayan” bəyanatından sonra gəlib. Naim Qasım həmçinin silahı yerə qoymayacaqlarını bir daha bəyan edib.
Bu qarşıdurma fonunda İsrailin Müdafiə naziri İsrail Kats da təhdidlərinin tonunu artırıb. Kats xəbərdarlıq edib ki, “Hizbullah”ın mövcudluğu Livanın yanmasına səbəb olacaq: “Əgər Livan hökuməti terrorçu Hizbullah təşkilatının qanadı altında gizlənməyə davam edərsə, alov daha da güclənəcək və Livanın sidr ağaclarını yandıracaq”.
