Qətər Elm və Texnologiya Parkı (QSTP) yerli və beynəlxalq texnoloji startapları dəstəkləmək, habelə ölkədə innovasiya ekosistemini gücləndirmək məqsədilə 30 milyon dollar dəyərində yeni vençur fondunun yaradıldığını elan edib. “The Peninsula Qatar“ın məlumatına görə, bu fond Qətərin iqtisadi diversifikasiya strategiyasının tərkib hissəsi olaraq, yüksək texnologiyalar sahəsində fəaliyyət göstərən şirkətlərə birbaşa investisiya yatıracaq.
ArabAZ xəbər verir ki, fondun əsas hədəfi süni intellekt, səhiyyə texnologiyaları, energetika və rəqəmsal transformasiya sahələrində erkən mərhələdə olan (early-stage) perspektivli layihələri maliyyələşdirməkdir. QSTP rəhbərliyi bildirib ki, bu təşəbbüs həm də xarici texnoloji şirkətlərin Qətər bazarına cəlb edilməsi üçün stimul yaradacaq. Qalib gələn startaplar təkcə maliyyə dəstəyi deyil, həm də parkın infrastrukturundan, laboratoriyalarından və mentorluq şəbəkəsindən yararlanmaq imkanı əldə edəcəklər.
Açıqlamada qeyd olunub ki, 30 milyon dollarlıq bu fond Qətərin 2030-cu il Milli İnkişaf Strategiyasının “bilik iqtisadiyyatı” hədəfinə çatmaq üçün həlledici rol oynayacaq. QSTP rəsmiləri vurğulayıblar ki, innovativ ideyaların kommersiyalaşdırılması və onların qlobal bazara çıxarılması regionun texnoloji suverenliyini təmin edən əsas amildir. Artıq bir neçə yerli startapın fonddan maliyyə almaq üçün müraciət prosesinə başlanılıb.
