Livan, İsrail və Amerika Birləşmiş Ştatları cümə günü Yaxın Şərqin iki uzunmüddətli rəqibi arasında sülh sazişinə yol açmaq məqsədi daşıyan üçtərəfli çərçivə sazişi imzalayıblar.
ArabAZ xəbər verir ki, təfərrüatları açıqlanmayan saziş, onilliklər boyu davam edən düşmənçiliyə, həmçinin Livanın cənubunda İsrail ilə Hizbullah arasında həftələrdir gedən döyüşlərə son qoymaq məqsədilə Vaşinqtonda keçirilən beş raundluq danışıqların nəticəsidir.
ABŞ Dövlət katibi Marko Rubio imzalama mərasimində bildirib ki, saziş “davamlı sülh və təhlükəsizlik üçün çərçivə yaratmağa başlayır”.
Livanın Vaşinqtondakı səfiri Nada Hamadeh Moavad sazişin “Livanın suverenliyinin və ərazi bütövlüyünün bərpası, hərbi əməliyyatların daimi və qəti şəkildə dayandırılmasının təmin edilməsi (və) xalqımızın öz torpaqlarına qayıtmasına imkan yaradılması yolunda ilk addım” olduğunu qeyd edib.
İsrailin ABŞ-dakı elçisi Yexiel Leyter isə sazişə əsasən, “İranın kənarda qaldığını, Hizbullahın kənarda qaldığını və İsrail ilə Livan arasında sülhə gedən yolun açıldığını” bəyan edib.
Hizbullah, ABŞ və İsrailin zərbələri nəticəsində İranın ali lideri Ayətullah Əli Xameneinin öldürülməsinin qisasını almaq üçün martın 2-də İsrailə raket atəşi açmaqla Livanı daha geniş Yaxın Şərq müharibəsinə sürükləmişdi.
Daha sonra İsrail dağıdıcı hava zərbələrinə və işğala başladı ki, Livan tərəfi bunun 4200-dən çox insanın ölümünə səbəb olduğunu bildirir.
ABŞ-ın təzyiqi altında Livan rəsmiləri aprel ayında Vaşinqtonda İsrail ilə birbaşa danışıqlara başladılar və aprelin 17-də atəşkəs elan edildi, lakin bu, sonda döyüşləri dayandıra bilmədi.
Bu ay isə yeni bir atəşkəs elan olundu, çünki Tehran fevralın sonlarında ABŞ və İsrail tərəfindən başladılan daha geniş münaqişəyə son qoymaq üçün Vaşinqtonla əldə etdiyi razılaşmanın mütləq Livanı da əhatə etməli olduğunu təkidlə tələb edirdi.
