Qətər əmiri Şeyx Təmim bin Həməd Al Sani və Suriya prezidenti Əhməd əş-Şəraa çərşənbə günü regional və beynəlxalq vəziyyətdəki son hadisələri müzakirə ediblər. Hər iki tərəf regionda təhlükəsizlik və sabitliyin dəstəklənməsinə sadiq olduqlarını vurğulayıblar.
ArabAZ xəbər verir ki, Qətər Diovanından verilən məlumata görə, çərşənbə günü Dohada, Əmiri Divanda keçirilən görüş zamanı iki ölkə arasındakı ikitərəfli əməkdaşlıq münasibətləri və onların müxtəlif sahələrdə dəstəklənməsi və inkişaf etdirilməsi yolları nəzərdən keçirilib.
Qətər əmiri Əş-Şəraanın Dohaya səfərinin iki ölkə arasında əməkdaşlıq əlaqələrinin güclənməsinə və müxtəlif sahələrdə daha geniş səviyyələrə yüksəlməsinə töhfə verəcəyinə ümid etdiyini bildirib.
Suriya prezidenti də öz növbəsində ölkəsinin Qətər dövləti ilə əməkdaşlıq əlaqələrini inkişaf etdirməkdə və iki ölkənin, eləcə də xalqların ümumi maraqlarına xidmət edəcək şəkildə möhkəmləndirməkdə maraqlı olduğunu təsdiqləyib.
Zati-aliləri Suriya prezidenti, İranın Qətərə və regionun bir sıra digər ölkələrinə qarşı təcavüzündən sonra ölkəsinin Qətər dövləti ilə həmrəyliyini, habelə suverenliyini, təhlükəsizliyini və vətəndaşlarının salamatlığını qorumaq üçün Qətərin həyata keçirdiyi tədbirlərə dəstəyini ifadə edib.
Görüşdə Baş nazir və xarici işlər naziri Şeyx Məhəmməd bin Əbdürrəhman Al Sani, Əmiri Divanın rəhbəri Abdulla bin Məhəmməd əl-Xüleyfi, xarici işlər üzrə dövlət naziri doktor Məhəmməd bin Əbdüləziz əl-Xüleyfi və bir sıra digər yüksək rütbəli rəsmilər iştirak ediblər.
Suriya tərəfindən isə görüşdə xarici işlər və mühacirlər naziri Əsəd əş-Şeybani və digər yüksək vəzifəli şəxslər iştirak ediblər.
Qətər əmiri və Suriya prezidenti ikitərəfli görüş keçirərək qarşılıqlı maraq doğuran mühüm məsələlər ətrafında fikir mübadiləsi aparıblar.
