“QatarEnergy” şirkəti Texas ştatının Sabin-Pass bölgəsində yerləşən “Golden Pass LNG” ixrac terminalından ilk mayeləşdirilmiş təbii qaz (LNG) partiyasının yola salınmasını qeyd edərək, ABŞ-dakı ən böyük investisiya layihəsində mühüm mərhələyə qədəm qoyub.
Bu hadisə Qətərin qlobal enerji bazarındakı mövqeyini gücləndirən strateji tərəfdaşlıq çərçivəsində baş tutub. “Golden Pass LNG” layihəsi “QatarEnergy” (70%) və “ExxonMobil” (30%) şirkətlərinin birgə müəssisəsidir. İllik istehsal gücü 18 milyon tondan çox olan bu terminal ABŞ-ın ən böyük LNG ixrac mərkəzlərindən biri hesab olunur.
ArabAZ xəbər verir ki, mərasimdə çıxış edən Qətərin energetika məsələləri üzrə dövlət naziri, “QatarEnergy”nin prezidenti və baş icraçı direktoru Səad bin Şerida Əl-Kaabi bildirib ki, “Bu gün biz təkcə ilk qaz ixracını deyil, həm də ABŞ-dakı ən böyük investisiya layihəmizin uğurla reallaşmasını qeyd edirik. Bu layihə bizim qlobal enerji təhlükəsizliyinə sadiqliyimizin və ABŞ-dakı tərəfdaşlarımızla güclü münasibətlərimizin sübutudur”.
Layihə Texas iqtisadiyyatına milyardlarla dollar investisiya cəlb etməklə yanaşı, minlərlə iş yerinin yaradılmasına da töhfə verib. “Golden Pass LNG” terminalı Qətərin beynəlxalq LNG portfelini şaxələndirmək və Amerika qazını dünya bazarlarına çıxarmaq strategiyasının əsas sütunlarından biridir.
İlk yükün yola salınması terminalın tam istismara verilməsi yolunda həlledici addımdır. Bu, Qətərin dünyanın aparıcı LNG istehsalçısı kimi statusunu daha da möhkəmləndirəcək və qlobal enerji keçidi dövründə təmiz yanacaq tədarükünü artıracaq.
