BAKI,AzerVoice, Fərid Mikayılov
İspaniyanın Real Madrid klubunun əfsanəvi futbolçusu Serxio Ramos doğma klubu Sevilyanın səhmlərini əldə etmək istiqamətində mühüm mərhələni geridə qoyub.
AzerVoice xəbər verir ki, Ramosun daxil olduğu investorlar konsorsiumu klubun əsas referens səhmdar qrupu ilə ilkin razılaşma əldə edib.
Razılaşma çərçivəsində tərəflər arasında eksklüziv danışıqlar mərhələsi başlayıb və bu müddətdə Sevilyanın maliyyə hesabatları ətraflı şəkildə araşdırılacaq.
Məlumata əsasən, Serxio Ramos argentinalı sahibkar, ABŞ-da futbol yönümlü investisiya qrupu olan “Five Eleven Capital”ın baş icraçı direktoru Martin İnk ilə birgə hərəkət edir. Bildirilir ki, Ramos klubun bir neçə əsas səhmdarı ilə niyyət protokolu imzalayıb və növbəti mərhələ hüquqi və maliyyə yoxlamalarını əhatə edəcək.
Mənbələr razılaşmanın ümumi dəyərinin 400 milyon avrodan çox olduğunu bildirir. Bununla yanaşı, Sevilyaya maraq göstərən daha doqquz investor qrupunun olduğu da qeyd edilir.
39 yaşlı Serxio Ramos futbolçu karyerasını hələ başa vurduğunu açıqlamayıb. O, Meksikanın Monterrey klubundan ayrıldıqdan sonra azad agent statusundadır və Avropaya qayıtmaq variantlarını nəzərdən keçirir. Ramosun əsas hədəflərindən birinin 2026-cı il dünya çempionatında İspaniya millisinin heyətinə düşmək olduğu bildirilir. O, indiyədək milli komandanın heyətində 180 oyun keçirib.
Qeyd edək ki, Ramos Sevilya akademiyasının yetirməsidir. O, 2005–2021-ci illərdə Real Madridin heyətində çıxış edərək beş La Liqa, dörd UEFA Çempionlar Liqası və Klublararası Dünya Çempionatı tituluna sahib olub. 2023-cü ildə isə PSJ-də iki mövsüm keçirdikdən sonra yenidən Sevilyaya qayıtmışdı.
