BAKI,VOA, Nailə Babazadə

Tailandın Baş naziri Anutin Çarnvirakul şənbə günü keçirdiyi mətbuat konfransında ölkəsinin neft daşımaları ilə bağlı strateji bir uğura imza atdığını elan edib.

VOA xəbər verir ki, baş nazir bildirib ki, Tailand və İran rəhbərliyi arasında Tailand neft tankerlərinin Hörmüz boğazından maneəsiz və təhlükəsiz keçməsinə icazə verən rəsmi razılaşma əldə olunub.

Anutin Çarnvirakul bu inkişafın Tailand iqtisadiyyatı üçün həyati əhəmiyyət kəsb etdiyini vurğulayıb. O, bu razılaşma sayəsində ölkədə yanacaq idxalı ilə bağlı yaranmış ciddi narahatlıqların və tədarük zəncirindəki risklərin əhəmiyyətli dərəcədə azalacağını qeyd edib. "Tailandın neft tankerlərinin Hörmüz boğazından təhlükəsiz tranziti üçün tam razılıq əldə edilib" – deyə Baş nazir mətbuat nümayəndələrinə bildirib.

Bu razılaşma regionda gərginliyin artdığı bir vaxtda Tailandın öz enerji təhlükəsizliyini qorumaq istiqamətində atdığı ən mühüm diplomatik addımlardan biri kimi qiymətləndirilir. Tailand tərəfi bu razılaşmanın həm ölkənin daxili bazarında neft qiymətlərinin sabitliyinə, həm də dəniz nəqliyyatının fasiləsizliyinə böyük töhfə verəcəyinə inanır.