BAKI,VOA, Fərid Mikayılov
İran parlamentinin sədri Məhəmməd Baqir Qalibaf bildirib ki, İran və ABŞ arasında imzalanmış anlaşma memorandumuna əsasən, Hörmüz boğazından keçid yalnız 60 gün müddətində ödənişsiz olacaq və Tehran bu strateji su hövzəsindəki suveren hüquqlarından geri çəkilməyəcək.
VOA xəbər verir ki, Qalibaf dövlət televiziyasına açıqlamasında qeyd edib ki, ödənişsiz keçid qərarı Fars körfəzi sahilyanı dövlətlərinin təkidi ilə qəbul olunub. Onun sözlərinə görə, müharibə və boğazın bağlanması səbəbindən bölgədə qalan gəmilər nəzərə alınaraq bu addım atılıb.
O əlavə edib ki, İran 30 gün ərzində Hörmüz boğazının minalardan təmizlənməsi üzrə öhdəliyini də yerinə yetirəcək.
Parlament sədri bildirib ki, anlaşma memorandumunun 5-ci maddəsinə əsasən, Hörmüz boğazının idarə olunması və burada göstərilən dəniz xidmətlərinin gələcək mexanizmi beynəlxalq hüquqa və sahilyanı dövlətlərin suveren hüquqlarına uyğun olaraq İran və Oman tərəfindən birgə müəyyən ediləcək.
Qalibaf vurğulayıb ki, Tehran bu məsələdə heç bir güzəştə getməyəcək və ABŞ-nin İranın Hörmüz boğazını hərbiləşdirdiyi barədə iddialarını qəbul etmir. Onun sözlərinə görə, İran bu strateji su yolunda təhlükəsizliyin təmin edilməsini davam etdirəcək.
O, həmçinin İran və ABŞ arasında imzalanmış 14 maddədən ibarət memorandum üzrə danışıqlar üçün 60 günlük müddətin müəyyən edildiyini bildirib. Qalibaf qeyd edib ki, tərəflərin razılığı ilə bu müddət yekun sülh sazişi, o cümlədən İrana tətbiq olunan bütün sanksiyaların ləğvi barədə razılıq əldə edilənədək uzadıla bilər.
Parlament sədri bildirib ki, ABŞ memorandum imzalandığı gün İrana qarşı dəniz blokadasını aradan qaldırıb. Onun sözlərinə görə, iyunun 18-dən bəri İran 40 milyondan çox barel neft ixrac edib və hazırda İran nefti beynəlxalq Brent etalon qiyməti ilə satılır.
Qalibaf vurğulayıb ki, İran raket proqramı, hücum potensialı, uranın zənginləşdirilməsi hüququ və "Müqavimət Oxu" ilə bağlı mövqeyi üzrə heç bir danışıq aparmayacaq. O əlavə edib ki, Tehran diplomatik danışıqları davam etdirsə də, bunun ölkənin hərbi çəkindiricilik imkanlarının zəiflədilməsi anlamına gəlmədiyini bildirib.
