BAKI, AzerVoice
Belçikada iki müxalifət partiyası hökuməti Fələstin dövlətini rəsmi şəkildə tanımağa çağırıb. Bu təşəbbüs Fransanın Fələstini tanımaq qərarından sonra ölkədə yenidən gündəmə gəlib.
AzerVoice xəbər verir ki, bu barədə Sosialist Partiyasının lideri Paul Magnette ölkədəki siyasi partiyalara ünvanladığı məktubda məlumat yayıb. O, Federal Parlamentə Fələstin dövlətinin tanınması ilə bağlı qanun layihəsi təqdim edəcəklərini bildirib və layihəyə dəstək istəyib.
Magnette məktubunda “sülh yalnız iki demokratik və müstəqil dövlət – İsrail və Fələstin – mövcud olduqda mümkündür”- deyə qeyd edib. Bu çağırışın beynəlxalq hüquqa və insan haqlarına münasibətdə ikili standartların qarşısını almaq üçün əhəmiyyətli olduğunu vurğulayıb.
Ecolo partiyasının həmsədri Samuel Koqolati isə sosial media hesabında Belçikanın İspaniya, Norveç və İrlandiyanın atdığı addımı izləməli olduğunu qeyd edib.
Koqolati əlavə edib ki, yalnız tanıma ilə kifayətlənmək olmaz, eyni zamanda İsraillə əməkdaşlığın məhdudlaşdırılması, sanksiyalar tətbiqi və Qəzzaya humanitar yardımların artırılması istiqamətində konkret addımlar atılmalıdır.
Ölkənin xarici işlər naziri Maxime Prevot isə məsələ ilə bağlı iyulun 25-də verdiyi açıqlamada bildirib ki, koalisiya razılaşması Fələstin dövlətinin tanınmasını nəzərdə tutur. “Əsas sual bunu edib-etməyəcəyimiz deyil, nə vaxt edəcəyimizdir”, – deyə nazir qeyd edib.
Prevot, sentyabr ayında keçiriləcək BMT Baş Assambleyasına qədər bu məsələdə hökumətin mövqe ortaya qoymasını təklif edəcəyini açıqlayıb. O, həmçinin Fələstindəki humanitar vəziyyətə diqqət çəkərək, İsrailin yardımın qarşısını almağa davam etdiyini, beynəlxalq çağırışlara baxmayaraq blokadaların qaldırılmadığını vurğulayıb.
