BAKI, AzerVoice, Orxan Qədirzadə
Misir rəsmiləri ölkənin yaxın günlərdə Qəzza zolağı ilə sərhəddə yerləşən Rəfah keçidini yenidən açmaq üçün İsraillə koordinasiya apardığı barədə yayılan məlumatları təkzib edib. AzerVoice xəbər verir ki, bu barədə Misirin Dövlət İnformasiya Xidməti Əl-Qahirə telekanalına açıqlamasında bildirib.
İsrail ordusunun humanitar məsələlərə cavabdeh qurumu - COGAT - Rəfah keçidinin bir neçə gün ərzində açılacağını, prosesin Misir və Avropa İttifaqı missiyası ilə koordinasiya olunacağını bildirib. Bu mexanizm 2025-ci ilin yanvarında tətbiq edilən son atəşkəs razılaşması zamanı da istifadə olunmuşdu.
ABŞ Prezidenti Donald Trampın iki illik müharibəni böyük ölçüdə dayandıran sülh planına əsasən, Rəfah keçidi hər iki istiqamətdə açılmalı idi.
Müharibədən əvvəl Qəzzalıların dünya ilə birbaşa əlaqə qura bildiyi yeganə sərhəd-nəzarət məntəqəsi olan Rəfah keçidi münaqişə müddətində demək olar ki, bağlı olub.
BMT-nin açıqlamasına əsasən, Qəzzada təxminən 16 500 nəfərin xaricdə tibbi müalicəyə ehtiyacı var. Az sayda xəstə İsrail marşrutu ilə xəstəxanalara çatdırılıb.
İsrail oktyabr ayında qüvvəyə minmiş atəşkəsdən sonra Rəfah keçidini hər iki istiqamətdə bağlı saxlayıb. Rəsmi Tel-Əviv bildirir ki, keçidin açılması üçün HƏMAS Qəzzada olan bütün girovları - həm sağ, həm də həlak olanları - geri qaytarmalıdır.
HƏMAS indiyədək 20 sağ girovu təhvil verib və bunun müqabilində təxminən 2 000 fələstinli məhbus azad edilib. Lakin iki nəfərin - İsrail polis əməkdaşı və Tailandlı kənd təsərrüfatı işçisinin - cəsədləri hələ də tapılmayıb.
HƏMAS-la müttəfiq olan İslami Cihad Qırmızı Xaçla birgə həlak olmuş girovlardan birinin cəsədinin yerini müəyyənləşdirmək üçün axtarış apardıqlarını açıqlayıb. Bu bəyanat HƏMAS-ın bir gün əvvəl təhvil verdiyi, lakin sonradan İsrailin məhkəmə-tibbi ekspertizasının həmin şəxslərə aid olmadığını müəyyən etdiyi qalıqlarla bağlı qalmaqaldan sonra gəlib.
Atəşkəs razılaşmasının növbəti mərhələsinə keçid bir sıra ciddi maneələrlə üzləşir. Bu maneələrə HƏMAS-ın tərksilah olunması, İsrail ordusunun Qəzzadan çıxması, anklavın gələcək idarəetmə modeli daxildir.
Misirin koordinasiyanı təkzib etməsinə baxmayaraq, Rəfah keçidinin yenidən açılması həm humanitar vəziyyətin yüngülləşməsi, həm də siyasi proseslərin davamı üçün həlledici əhəmiyyət daşıyır.
