BAKI, AzerVoice, Orxan Qədirzadə
İraqda ötən ay keçirilmiş parlament seçkilərinin yekun nəticələri bazar günü ölkənin Ali Federal Məhkəməsi tərəfindən təsdiqlənib.
AzerVoice xəbər verir ki, elan edilən qərarla müvəqqəti baş nazir Məhəmməd Şia əs-Sudaniyə bağlı siyasi qüvvənin mandat sayının çoxluğu təsdiqlənsə də, bu nəticə onun ikinci müddətə hökumət qurması üçün yetərli deyil.
Məhkəmə açıqlamasında bildirib ki, səsvermə prosesi konstitusiya və qanunvericiliyin bütün tələblərinə uyğun keçirilib və nəticələrin legitimliyinə təsir göstərə biləcək ciddi pozuntu qeydə alınmayıb.
İraqın Müstəqil Ali Seçki Komissiyası bazar ertəsi günü parlament seçkilərinin yekun nəticələrini rəsmi təsdiq üçün Ali Federal Məhkəməyə təqdim edib. Bildirilir ki, bu addım seçkilərlə bağlı daxil olmuş 853 şikayətin araşdırılıb yekunlaşdırılmasından sonra atılıb.
Qeyd edək ki, nəticələrin məhkəmə tərəfindən təsdiqlənməsi yeni hökumətin formalaşdırılması prosesinin hüquqi əsasını yaradır. Bununla belə, parlamentdə mandat bölgüsü Sudaniyə ikinci müddət üçün təkbaşına hökumət qurmaq imkanı vermir və qarşıdakı dövrdə siyasi danışıqların intensivləşəcəyi gözlənilir.
