BAKI,VOA,Yusif Şərifzadə

Fələstin rəsmilərinin məlumatına görə, yəhudilərin Tişa BeAv matəm günü münasibətilə 4 200-dən çox israilli Şərqi Qüdsdə yerləşən Əl-Əqsa məscidi kompleksinə daxil olub.

VOA xəbər verir ki, gün ərzində kompleksə daxil olanların sayı əvvəl açıqlanan 2 300 nəfərlə müqayisədə əhəmiyyətli dərəcədə artaraq 4 200-ü keçib.

Məlumata görə, İsrailin milli təhlükəsizlik naziri İtamar Ben-Qvir də gücləndirilmiş polis mühafizəsi altında əraziyə daxil olub.

Tişa BeAv yəhudi ənənəsində qədim dövrdə mövcud olmuş iki yəhudi məbədinin dağıdılmasının anım günü kimi qeyd olunur. Həmin məkan müsəlmanlar tərəfindən Əl-Əqsa məscidi kompleksi, yəhudilər tərəfindən isə Məbəd dağı adlandırılır.

Əl-Əqsa kompleksi uzun illərdir israillilər və fələstinlilər arasında dini və siyasi baxımdan ən həssas məkanlardan biri hesab olunur və burada baş verən hadisələr tez-tez gərginliyin artmasına səbəb olur.

İsrail tərəfi hadisə ilə bağlı əlavə rəsmi açıqlama verməyib.