BAKI, AzerVoice, Səməd Əyyubov
HƏMAS İsrailin Baş naziri Benyamin Netanyahunu əsir mübadiləsi və atəşkəs razılaşmasının əldə olunmasına mane olmaqda ittiham edib.
AzerVoice-un məlumatına görə, HƏMAS Netanyahunun Qəzza şəhərinin işğalı planına razılıq verməsini razılaşmanı pozmaq istəyi kimi qiymətləndirib.
HƏMAS açıqlamasında qismən razılaşmanı qəbul etdiyini, həmçinin ümumi razılaşmaya da hazır olduğunu bildirib, lakin Netanyahunun bütün təklifləri rədd etdiyini vurğulayıb. HƏMAS, ABŞ Dövlət Departamentinin sabiq sözçüsü Metyu Millerin etiraflarının da Netanyahunun danışıqları pozmaq üçün yalan taktikasından istifadə etdiyini təsdiqlədiyini qeyd edib.
HƏMAS bəyan edib ki, əsirlərin azad olunmasının yeganə yolu atəşkəsdir və onların taleyinə görə bütün məsuliyyət Netanyahunun üzərindədir. HƏMAS Qəzzadakı münaqişənin Təl-Əvivin “mütləq qələbə” adlandırdığı anlayışın əslində bir illüziya olduğunu üzə çıxardığını bildirib. O, Fələstin xalqına qarşı aparılan aclıq və soyqırım siyasətinə son qoyulması üçün rəsmi və ictimai təzyiqlərin davam etdirilməsinə çağırıb.
Qeyd edək ki, HƏMAS və digər fələstinli fraksiyalar ötən bazar ertəsi Qətər və Misirin vasitəçiliyi ilə təqdim edilən təklifi qəbul etdiklərini açıqlamışdı. İsrail isə hələ ki, bu addıma cavab verməyib. Əksinə, Tel-Əviv Qəzza şəhərinin işğalı üçün 60 min ehtiyat hərbçinin cəlb edilməsini nəzərdə tutan hərbi planı təsdiqləyib. Bu isə iki milyondan çox fələstinlinin yaşadığı bölgədə humanitar böhranı daha da dərinləşdirə bilər.
