BAKI, AzerVoice
Avropa İttifaqı (Aİ), İsrailin Qəzzadakı fəaliyyətləri və humanitar yardımın qarşısını alması səbəbilə ona qarşı sanksiya tədbirlərini nəzərdən keçirir.
AzerVoice xəbər verir ki, bu barədə Fransanın xarici işlər naziri Jan-Noel Barro “Al Arabiya” telekanalına açıqlama verib.
“Son aylarda Qəzzada baş verən hadisələr bizi dərindən sarsıdıb. Bu bölgədə baş verənlər rüsvayçılıq və utanc mənbəyidir. Buna dərhal son qoyulmalıdır. Avropa İttifaqı İsrailə qarşı sanksiyaların tətbiqinə səs vermək niyyətindədir” - deyə, Barro bildirib.
O qeyd edib ki, Avropa Komissiyası İsrail hökumətinə qarşı bir sıra məhdudlaşdırıcı tədbirlər təklif edib.
Barro Parisin, İsrailin Qəzzada yardımın paylanması sistemi ilə bağlı narahatlığını ifadə edib. O, həmçinin İsrail hakimiyyətini Misirin Əl-Əriş şəhərində gözləyən Fransaya məxsus humanitar yardımın Qəzza zolağına çatdırılmasını təmin etməyə çağırıb.
“Biz İsrailə deyirik ki, əgər fələstinlilər öz dövlətlərinə sahib olsalar, sizin təhlükəsizliyiniz təmin olunacaq” - deyə, o qeyd edib.
Onun fikrincə, Paris və Ər-Riyadın təşəbbüsü ilə keçirilən BMT-nin Fələstin üzrə konfransı, Fələstin dövlətinin tanınmasına yeni təkan verib. Nazirin sözlərinə görə, konfransın yekun sənədində HƏMAS-ın fəaliyyəti pislənib və HƏMAS-ın silahsızlaşdırılması ilə bağlı çağırış yer alıb.
Qeyd edək ki, Avropa Komissiyası Qəzza zolağındakı vəziyyətin pisləşməsi fonunda Aİ-İsrail Assosiasiya Sazişinin qismən dayandırılmasını nəzərdən keçirir. Məlumata görə, Brüssel İsrailin “Horizon Europe” adlı elmi-tədqiqat proqramında iştirakının dayandırılmasını təklif edəcək. Bu addım, Avropa İttifaqının xarici siyasət rəhbəri Kaya Kallasın daha əvvəl təqdim etdiyi 10 variant arasında ən yumşaq tədbirlərdən biri sayılır.
Qeyd edək ki, BMT-nin Ümumdünya Ərzaq Proqramı daha əvvəl bildirmişdi ki, 2023-cü ilin oktyabrında münaqişənin kəskinləşməsindən sonra Qəzza zolağında ərzaq istehlakı ilə bağlı əsas göstəricilər ən pis səviyyəyə çatıb. “Ərzaq Təhlükəsizliyinin İnteqrasiya Olunmuş Faza Təsnifatı” (IPC) beynəlxalq monitorinq təşəbbüsünün məlumatına görə, Qəzza əhalisinin 39 faizi bir neçə gün ardıcıl olaraq aclıq çəkir, 500 mindən çox insan (əhalinin təxminən dörddə biri) aclığa bənzər şəraitdə yaşayır.
