BAKI, AzerVoice, Fərid Mikayılov
İsrail dövlət televiziyası KAN, İsrail ordusunun Qəzza zolağına humanitar yardım aparmaq üçün yola çıxan və Aralıq dənizində hərəkətini davam etdirən “Azadlıq Flotiliyası”na müdaxilə etməyə hazırlaşdığını bildirib.
AzerVoice xəbər verir ki, onlarla gəmindən ibarət flotiliya dörd gün ərzində Qəzzaya çatacaq.
İsrail qüvvələrinin isə flotiliyanı nəzarət altına almaq üçün hərəkətə keçəcəyi qeyd olunub.
Xəbərdə bildirilir ki, İsrail donanmasının xüsusi təyinatlı “Şayetet” birliyi son günlərdə açıq dənizdə gəmilərə müdaxilə təlimləri keçirib. İddialara görə, bu hazırlıqlar əməliyyat zamanı mümkün itkiləri minimuma endirmək məqsədilə aparılıb.
İsrail tərəfi flotiliya təşkilatçılarına yardımların Aşkelon limanı, Kipr və ya Vatikan üzərindən çatdırılmasını təklif edib. Lakin bu təkliflər qəbul edilməyib. Tel-Əviv rəhbərliyi isə vəziyyəti “təşkil olunmuş təxribat” kimi qiymətləndirib.
Onlarla gəmindən ibarət “Azadlıq Flotiliyası” günlərdir Qəzzaya doğru hərəkət edir. Donanma əsasən tibbi ləvazimatlar olmaqla çoxlu sayda humanitar yardım daşıyır və bu, indiyədək Qəzzaya göndərilən ən böyük kollektiv yardım flotiliya hesab olunur.
