BAKI,AzerVoice,Fərid Mikayılov
Mərkəzi Amerika ölkəsi Hondurasda 30 noyabr tarixində keçirilən prezident seçkilərinin qalibi fələstin əsilli mühafizəkar namizəd Nasri Asfura olub.
AzerVoice xəbər verir ki, Honduras Milli Seçki Şurasının (CNE) açıqladığı rəsmi nəticələrə əsasən, Milli Partiyanın namizədi Asfura səslərin 40,26 faizini toplayaraq birinci yerə çıxıb.
“Papi a la orden” ləqəbi ilə tanınan Asfuranın ən yaxın rəqibi, Liberal Partiyanın namizədi Salvador Nasralla 39,54 faiz səslə ikinci olub.
Hakim Azadlıq və Yenidənqurma Partiyasının (Libre) namizədi Riksi Monkada isə 19,19 faiz səslə seçkiləri üçüncü pillədə başa vurub.
Seçki nəticələrinin açıqlanmasından sonra Salvador Nasralla səslərin tam sayılmadığını əsas gətirərək nəticələri tanımadığını bəyan edib. Namizədlər arasında səs fərqinin az olması və etirazların mövcudluğu səbəbindən səsvermənin yekun nəticələri gecikmə ilə elan olunub.
Honduras Milli Seçki Şurasının sədri Ana Paola Hall seçki prosesi zamanı texniki problemlərin yaşandığını təsdiqləyərək, yekun nəticələrin gecikə biləcəyi barədə əvvəlcədən məlumat vermişdi.
Nasri Asfuranın siyasi fəaliyyəti
8 iyun 1958-ci ildə paytaxt Tequsiqalpada anadan olan Nasri Asfura biznes sahəsindən siyasətə gələn şəxslərdən biridir. O, Tequsiqalpa şəhərinin meri vəzifəsində iki müddət çalışıb və bu dövrdə nəqliyyatın yaxşılaşdırılmasına yönəlmiş iri infrastruktur layihələrinin icrasına üstünlük verib.
Prezidentlik kampaniyası zamanı Asfura maliyyə sabitliyi, məşğulluğun artırılması və istehsal yönümlü infrastrukturun gücləndirilməsi məsələlərini əsas prioritet kimi təqdim edib. O, eyni zamanda kənd təsərrüfatı və heyvandarlığın dəstəklənməsi, nəqliyyat bağlantılarının təkmilləşdirilməsi və yerli iqtisadiyyata dərhal təsir göstərəcək layihələrin həyata keçirilməsi vədləri ilə çıxış edib.
Nasri Asfura 2020-ci ildə çirkli pulların yuyulması, dələduzluq və dövlət vəsaitlərindən sui-istifadə ittihamları ilə gündəmə gəlsə də, bu iddiaları rədd edib. O, həmçinin beynəlxalq korrupsiya araşdırması olan Pandora Sənədləri ilə heç bir əlaqəsinin olmadığını bildirib.
ABŞ Prezidenti Donald Tramp seçki kampaniyası dövründə Nasri Asfuraya açıq dəstək nümayiş etdirərək, onun qalib gələcəyi təqdirdə Hondurasa genişmiqyaslı dəstək veriləcəyini bəyan etmişdi.
