BAKI, AzerVoice, Nailə Babazadə
Xorvatiya Prezidenti Zoran Milanoviç, paytaxt Zaqrebdə rəsmi səfərdə olan İsrailin xarici işlər naziri Gideon Saar ilə Qəzzada davam edən müharibə səbəbindən görüşməkdən imtina edib.
AzerVoice xəbər verir ki, Milanoviç bu barədə sosial şəbəkə hesabında paylaşım edib.
"İsrailli bir nazirin Xorvatiyaya niyə dəvət edildiyini və niyə Baş nazir Andrej Plenkoviç, Xarici İşlər Naziri Qordan Grliç Radman və Parlament Sədri Qordan Yandrokoviçin onunla görüşdüyünü başa düşmürəm." - deyə Milanoviç qeyd edib.
Milanoviç, İsrailin Qəzzə zolağında dinc əhaliyə qarşı törətdiyi zorakılıqlar və etnik təmizləmə siyasəti fonunda belə bir səfərin qəbuledilməz olduğunu vurğulayıb.
"Əgər mən bu hökumətdən biri ilə görüşsəydim, bu, İsrailin həyata keçirdiyi zorakılıqları, etnik təmizləməni və müharibə cinayətlərini qəbul etmək olardı", – deyə o bildirib.
Milanoviç, Xorvatiya hökumətinin Fələstin dövlətini tanımaq əvəzinə, İsrailin müharibə və zorakılıq siyasətinə dəstək verməsini tənqid edib.
"Qəzzayə edilən hücumları Xorvatiyada 1990-cı illərdə baş vermiş müharibə ilə müqayisə etmək ciddi yanlışlıqdır. O zaman Xorvatiya özünü müdafiə edirdi. İsrail isə bu gün Qəzzayə vəhşicəsinə hücum edir, on minlərlə insanı qətlə yetirir." - deyə Milanoviç vurğulayıb.
Qeyd edək ki, İsrailin xarici işlər naziri Gideon Saar, Baş nazir Plenkoviçlə görüşü öncəsi Zaqreb şəhərində kütləvi etiraz aksiyası ilə qarşılanıb.
