BAKI, AzerVoice, Nailə Babazadə
İran prezidenti Məsud Pezeşkian bazar ertəsi Dohada keçiriləcək fövqəladə sammitdən əvvəl çıxış edərək İslam ölkələrini İsraillə münasibətləri kəsməyə çağırıb.
AzerVoice xəbər verir ki, Pezeşkian bildirib ki, İsrail “heç bir hüquqi çərçivəni tanımır, qanunlara hörmət etmir” və İslam ölkələri birlik və həmrəyliyi qorumaq üçün bu “saxta rejimlə” əlaqələrini kəsə bilərlər.
Dohada keçirilən fövqəladə ərəb-islam sammiti öncəsi danışan İran lideri ümid etdiyini bildirib ki, görüş İsrailə qarşı praktik addımlar barədə nəticə verəcək. O əlavə edib ki, “sionist rejim” yalnız Fələstində deyil, bir sıra İslam ölkələrinə qarşı da təcavüzkar hərəkətlər edib.
Pezeşkian ABŞ-ı və bir sıra Qərb dövlətlərini İsrailin bölgədə “istədiyi kimi hərəkət etməsinə” dəstək verməkdə ittiham edib.
Xatırladaq ki, ötən çərşənbə axşamı İsrail Dohada HƏMAS rəhbərlərinə aid yaşayış məntəqələrinə zərbələr endirib. Bu hücum ərəb və beynəlxalq dairələrdə kəskin pislənib.
Bir çox ölkə Dohaya edilən hücumu Qətərin suverenliyinin pozulması, beynəlxalq qanun və konvensiyaların açıq şəkildə pozulması, həmçinin Fələstin müqaviməti ilə İsrail arasında vasitəçilik edən bir dövlətə qarşı təcavüz kimi qiymətləndirib.
