BAKI, AzerVoice, Nailə Babazadə
Birləşmiş Millətlər Təşkilatı (BMT), növbəti Baş katibin müəyyən edilməsi üçün seçki prosesinə rəsmi şəkildə start verib. BMT Baş Assambleyası və BMT Təhlükəsizlik Şurası, üzv dövlətlərə namizədlərini təqdim etmələri üçün birgə məktub göndərib.
AzerVoice xəbər verir ki, BMT Baş Assambleyasının Prezidenti Annalena Baerbock açıqlamasında bildirib ki, o və Təhlükəsizlik Şurasının cari sədrliyini həyata keçirən Syerra-Leonenin BMT Daimi Nümayəndəsi Maykl İmran Kanu məktubu imzalayaraq üzv ölkələrə təqdim ediblər.
Baerbock, yeni Baş katibin seçiləcəyi dövrün BMT üçün “kritik bir mərhələyə” təsadüf etdiyini vurğulayaraq, artan münaqişələr, iqlim böhranı və humanitar ehtiyacların fonunda dünyanın BMT-yə hər zamankından daha çox ehtiyac duyduğunu qeyd edib.
Birgə məktubda, indiyə qədər heç bir qadının BMT Baş katibi vəzifəsində çalışmamasının “üzücü” olduğu qeyd edilərək, yüksək səviyyəli qərarverici vəzifələrdə qadın və kişilər üçün bərabər imkanların təmin edilməsinin vacibliyi xüsusi vurğulanıb.
Məktuba əsasən, hər bir üzv dövlət təkbaşına və ya digər dövlətlərlə birlikdə yalnız bir namizəd irəli sürə bilər. Təhlükəsizlik Şurası təqdim edilən namizədləri 2026-cı ilin iyuluna qədər dəyərləndirərək seçilmiş namizədi Baş Assambleyanın səsverməsinə göndərəcək.
Baş katib vəzifəsinə namizədlər Təhlükəsizlik Şurasının 5 daimi üzvü tərəfindən veto edilməməlidir. Gizli səsvermədə namizədin irəli çəkilməsi üçün Təhlükəsizlik Şurasında ən azı 9 səs, daha sonra Baş Assambleyada isə seçilmək üçün minimum 97 səs toplaması tələb olunur.
Hazırkı Baş katib Antonio Quterreş 1 yanvar 2017-ci ildən bu vəzifəni icra edir və ikinci müddəti 31 dekabr 2026-da başa çatacaq.
