BAKI, AzerVoice, Nailə Babazadə
İran ordusu ölkədə artan zorakılıq hadisələri fonunda “milli maraqları qoruyacağıq” mesajını verib.
AzerVoice xəbər verir ki, İran dövlət televiziyasının məlumatına görə, İran ordusu ölkədə baş verən etiraz aksiyaları və son dövrdə artan zorakılıq halları ilə bağlı açıqlama yayıb.
Açıqlamada İran xalqının birlik və həmrəylik içində hərəkət etməsinin vacibliyi vurğulanıb, İran ordusunun digər silahlı qüvvələrlə birlikdə “milli maraqları, strateji infrastrukturu və dövlət əmlakını qətiyyətlə qoruyacağı” bildirilib.
“Bu gün düşmən müxtəlif taktikalardan istifadə edərək ictimai asayişi pozmağa və ölkədə qeyri-sabit mühit yaratmağa çalışır. 12 günlük müharibə zamanı uşaqların qanına bulaşmış düşmən, İran xalqını qorumaq bəhanəsi ilə yeni fitnə törətməyə cəhd edir.” - deyə açıqlamada qeyd edilib.
Qeyd olunub ki, 2025-ci il dekabrın 28-də ölkənin milli valyutasının xarici valyutalar qarşısında kəskin dəyər itirməsi və iqtisadi problemlər səbəbindən Tehranın Böyük Bazarında ticarətçilərin başladığı etiraz aksiyaları qısa müddətdə ölkənin bir çox şəhərinə yayılıb.
Etirazlar zamanı ölən və yaralananlarla bağlı rəsmi açıqlama verilməsə də, İran İnsan Haqları Aktivistləri Xəbər Agentliyi (HRANA) yanvarın 9-da, aksiyaların 13-cü günündə yayımladığı hesabatda 15-i təhlükəsizlik əməkdaşı olmaqla 65 nəfərin həlak olduğunu, onlarla şəxsin yaralandığını və 2 min 311 nəfərin saxlanıldığını bildirib.
