BAKI, VOA, Nailə Babazadə
"New York Times" (NYT) qəzetinin peyk görüntüləri, sosial media videoları və rəsmi mənbələrə istinadən yaydığı xəbərdə ABŞ və İsrailin hücumlarına cavab olaraq İranın həyata keçirdiyi əməliyyatlar nəticəsində Amerikanın 17 hərbi və diplomatik obyektinin vurulduğu iddia edilir.
VOA xəbər verir ki, məlumata görə, bəzi ABŞ müəssisələri bir neçə dəfə hədəf alınıb və bu hücumlar Vaşinqton rəsmilərinin proqnozlaşdırdığından daha genişmiqyaslı xarakter daşıyıb. Xüsusilə vurğulanır ki, İranın döyüşə hazırlıq səviyyəsi gözləniləndən yüksək olub və Tehran münaqişənin başladığı gündən bəri Yaxın Şərqdəki hərbi hədəflərə minlərlə raket və pilotsuz uçuş aparatı (PUA) göndərib.
ABŞ rəsmiləri hücumların böyük hissəsinin dəf edildiyini bildirsələr də, NYT regiondakı ən azı 11 hərbi baza və ya obyektin zərər gördüyünü qeyd edir ki, bu da bölgədəki bütün ABŞ obyektlərinin təxminən yarısına bərabərdir. Fevralın 28-də Səudiyyə Ərəbistanındakı "Prince Sultan", Qətərdəki "El Udeyd", Küveytdəki "Ali el-Salem" və "Camp Buehring" aviabazaları İranın hədəfində olub. Peyk görüntüləri Küveytdəki "Camp Arifjan" bazası və Şuayba limanı, Bəhreyndəki 5-ci Donanma Qərargahı, habelə İraqdakı Ərbil və İordaniyadakı "Muvaffaq Salti" bazalarında ciddi binaların və rabitə infrastrukturunun dağıldığını nümayiş etdirir. Pentaqonun hesabatına görə, təkcə Bəhreyndəki qərargaha edilən bir hücumun vurduğu maliyyə zərəri təxminən 200 milyon dollar təşkil edir.
İranın taktikasında əsas diqqət ABŞ və müttəfiqlərinin hava hücumundan müdafiə və rabitə infrastrukturunun sıradan çıxarılmasına yönəlib. Xüsusilə radar sistemlərinin və THAAD hava hücumundan müdafiə elementlərinin zərbələrə məruz qaldığı bildirilir. Məsələn, İordaniyadakı "Muvaffaq Salti" aviabazasında qiyməti 500 milyon dollar olan radar sensorlarından biri ciddi zədələnib. Həmçinin Qətərdə yerləşən, 3 min mil məsafəni əhatə edən və inşasına 1,1 milyard dollar xərclənən uzunmənzilli AN/FPS-132 radar sisteminin də İranın hədəfinə çevrildiyi və ehtimal ki, zərər gördüyü iddia edilir.
Hərbi hədəflərlə yanaşı, ABŞ-ın diplomatik nümayəndəlikləri də hücumların hədəfi olub. Dubaydakı konsulluq, Küveyt və Səudiyyə Ərəbistanındakı səfirliklər təhlükəsizlik səbəbindən müvəqqəti bağlanıb, Bağdaddakı səfirlik isə raket atəşinə tutulub. Diplomatik obyektlərə edilən hücumlarda can itkisi qeydə alınmasa da, hərbi bazalara endirilən zərbələr nəticəsində indiyədək 7 ABŞ hərbçisinin həlak olduğu xatırladılır. Bu hadisələr regiondakı Amerika hərbi və diplomatik varlığının son illərin ən böyük təhlükəsi ilə üz-üzə qaldığını göstərir.
