BAKI, AzerVoice, Nailə Babazadə
Türkiyənin xarici işlər naziri Hakan Fidan 4–5 noyabr tarixlərində Finlandiyaya rəsmi səfər edəcək. Səfər çərçivəsində o, Finlandiyanın xarici işlər naziri Elina Valtonen və parlament sədri Yussi Halla-Aho ilə görüşəcək.
AzerVoice xəbər verir ki, diplomatik mənbələrdən bildirilib ki, Hakan Fidan bu ilin may ayında Antalyada keçirilən NATO xarici işlər nazirlərinin qeyri-rəsmi toplantısı çərçivəsində Finlandiya xarici işlər nazirini Türkiyədə qəbul etmişdi.
Fidanın səfər proqramına Finlandiya Parlamentində təşkil ediləcək “Türkiyə–Finlandiya əməkdaşlığı” mövzusunda tədbirdə çıxış etməsi və oradakı Tatar icmasının nümayəndələri ilə görüşməsi də daxildir.
Nazir Fidanın görüşlər zamanı Türkiyə ilə Finlandiya arasında ticarət, investisiya və müdafiə sənayesi sahələrində əməkdaşlığın qarşılıqlı fayda prinsipi əsasında dərinləşdirilməsinin vacibliyini vurğulaması gözlənilir. O, həmçinin informasiya texnologiyaları, kibertəhlükəsizlik, maliyyə texnologiyaları və bərpa olunan enerji kimi sahələrdə daha sıx əməkdaşlığa hazır olduqlarını ifadə edəcək.
Fidanın Arktika bölgəsində birgə layihələrin iki ölkə münasibətlərinə yeni baxış gətirəcəyini qeyd etməsi, Finlandiyanın Türkiyənin Avropa İttifaqına üzvlük prosesinə verdiyi dəstəyə görə təşəkkür etməsi və Gömrük İttifaqının yenilənməsi, viza rejiminin sadələşdirilməsi kimi məsələlərdə irəliləyişin vacibliyini vurğulaması da planlaşdırılır.
Nazirin, Türkiyə və Finlandiyanın beynəlxalq platformalarda, xüsusilə BMT və ATƏT çərçivəsində yaradılmış “Vasitəçilik Dostları Qrupları” vasitəsilə qlobal sülh səylərini davam etdirməsinin əhəmiyyətini ifadə etməsi gözlənilir. Fidanın, Finlandiyanın yeni NATO üzvü kimi Avropa–Atlantik təhlükəsizliyinə mühüm töhfə verəcəyinə inandığını və Türkiyənin alyans çərçivəsində bu ölkəyə tam dəstək göstərməyə hazır olduğunu deməsi də nəzərdə tutulur.
Bundan əlavə, Fidanın Rusiya–Ukrayna müharibəsinin ədalətli və davamlı sülh yolu ilə başa çatdırılması üçün Türkiyənin diplomatik vasitəçilik rolu oynamağa hazır olduğunu, Qəzzada atəşkəsin qorunması və humanitar yardımların fasiləsiz çatdırılmasının həyati əhəmiyyət daşıdığını vurğulaması da gözlənilir.
Qeyd edək ki, Türkiyə ilə Finlandiya arasında diplomatik münasibətlər 1924-cü ildə imzalanan “Dostluq Müqaviləsi” ilə qurulub. Hər iki ölkə 2010-cu ildə BMT çərçivəsində “Sülh üçün Vasitəçilik” təşəbbüsünə birgə rəhbərlik edib. İki ölkə arasındakı ticarət dövriyyəsi 2024-cü ildə təxminən 1,8 milyard ABŞ dolları təşkil edib.
