BAKI, VOA, Orxan Qədirzadə
Türkiyənin Xarici İşlər naziri Hakan Fidan Qətərin Baş naziri və Xarici İşlər naziri Məhəmməd bin Əbdülrəhman Əl Tani ilə keçirdiyi birgə mətbuat konfransında Yaxın Şərqdəki gərginliyə görə birbaşa İsraili ittiham edib.
VOA xəbər verir ki, Fidan Ankaranın İrandakı mülki infrastruktura və dinc əhaliyə edilən hücumları qətiyyətlə pislədiyini bildirib.
Nazir Fidan çıxışında "Bölgəmizin görünməmiş bir böhrana sürüklənməsinin əsas tərəfi və günahkarı İsraildir" deyərək, Türkiyənin bu qeyri-sabitlik fonunda Qətərin yanında olduğunu vurğulayıb. Türkiyə diplomatiyasının rəhbəri qeyd edib ki, Ankara bölgədə sülhün bərpası üçün Doha ilə sıx əməkdaşlığı davam etdirəcək.
Xatırladaq ki, Fidanın bu səfəri 28 fevralda ABŞ və İsrailin İrana qarşı başlatdığı hərbi əməliyyatdan sonra yaranan kəskin eskalasiya dövrünə təsadüf edir. Türkiyə naziri Yaxın Şərq ölkələrinə səfəri çərçivəsində münaqişənin dayandırılması və regional sabitliyin təmin olunması istiqamətində silsilə danışıqlar aparır.
