Beynəlxalq reytinq agentliyi “Fitch Ratings” Səudiyyə Ərəbistanının xarici valyutada uzunmüddətli emitent defolt reytinqini (IDR) Krallığın güclü fiskal mövqeyini, böyük maliyyə ehtiyatlarını və dayanıqlı iqtisadiyyatını əsas gətirərək “A+” səviyyəsində, proqnozu isə “sabit” olaraq təsdiqləyib.
ArabAZ xəbər verir ki, “Fitch” özünün son hesabatında bildirib ki, Səudiyyə Ərəbistanının kredit profili hökumətin aşağı borcu, “A” və “AA” kateqoriyalı ölkələrin orta göstəricilərindən əhəmiyyətli dərəcədə güclü olan suveren xalis xarici aktivləri və böyük fiskal buferləri (maliyyə yastıqları) ilə dəstəklənir. Agentlik qeyd edib ki, Krallıq qeyri-neft iqtisadi fəallığının gücü və ağlabatan fiskal idarəetmə sayəsində regional geosiyasi hadisələrə baxmayaraq öz iqtisadi dözümlülüyünü qoruyub saxlaya bilib.
Bank sektorunun sabitliyi və ÜDM artımı proqnozları
Agentliyin rəsmi hesabatında Səudiyyə Ərəbistanının bank sektorunun sağlamlığı xüsusi vurğulanıb. Bildirilib ki, banklar yüksək kapital səviyyəsinə, aşağı vaxtı keçmiş kredit göstəricilərinə malikdir və son regional gərginliklər zamanı mərkəzi bankın dəstəyinə ehtiyac duymayıblar.
“Fitch”in iqtisadi artım proqnozları aşağıdakı kimidir:
2026-cı il proqnozu: Hörmüz boğazı vasitəsilə dəniz nəqliyyatının normallaşması prosesi fonunda Krallığın real ÜDM artımının 0.6% səviyyəsində mülayim olacağı gözlənilir.
2027-ci il proqnozu: Neft və neft-kimya istehsalının artması ilə iqtisadiyyat yenidən sürətlə bərpa olunacaq.
Güclü xarici balans və institusional islahatlar
“Fitch” Səudiyyə Ərəbistanının xarici balans hesabatının qənaətbəxş olduğunu vurğulayaraq, beynəlxalq ehtiyatların 2026-cı ildə cari xarici ödənişlərin təxminən 11.6 aylıq həcminə bərabər qalacağını proqnozlaşdırır ki, bu da eyni reytinqli ölkələrin orta göstəricisindən qat-qat yüksəkdir.
Agentlik həmçinin əlavə edib ki, Krallıq təkmilləşən dövlət idarəçiliyi, güclənən institutlar və getdikcə şaxələndirilən (diversifikasiya olunan) iqtisadiyyat modelindən bəhrələnməyə davam edir.
