Portuqaliyalı məşhur mütəxəssis, “ən-Nəsr”in sabiq baş məşqçisi Jorje Jezusun vəkili Luis Migel müvəkkilinin yaxın gələcəkdə yunanıstanlı Georgios Donisi əvəzləyərək Səudiyyə Ərəbistanı millisində sükan arxasına keçəcəyi ilə bağlı yayılan xəbərlərə aydınlıq gətirib.
ArabAZ xəbər verir ki, Mundialdakı uğursuzluqdan sonra, Krallığın ev sahibliyi edəcəyi “Körfəz kuboku-27” (Xəlici 27) və Asiya Kuboku turnirləri ərəfəsində Jezusun adı “Yaşıl şahinlər”in əsas namizədləri siyahısında ön plana çıxıb. Vəkil Luis Migel Səudiyyə Ərəbistanının “ər-Riyadiyyə” qəzetinə verdiyi açıqlamada yerli federasiya rəsmiləri ilə portuqaliyalı məşqçi arasında müəyyən təmasların olduğunu təsdiqləyib. Lakin o bildirib ki, bu söhbətlər yalnız ilkin rəsmi sorğu mərhələsində qalıb və hələlik tam hüquqlu danışıqlara çevrilməyib.
Səudiyyə Ərəbistanının Jezus planı və Braziliya xəyalı
“ən-Nəsr”lə yollarını ayırdıqdan sonra rəsmilərlə danışıqlar aparılsa da, hazırda masada rəsmi və konkret bir təklifin olmadığını vurğulayan vəkil, təcrübəli məşqçinin gələcək planlarından da danışıq.
“Jorje Jezus böyük ehtimalla karyerasını Portuqaliyada davam etdirmək istəyir. Hazırda onun qarşısında rəsmi bir klub təklifi yoxdur, lakin Qətər, Türkiyə və Braziliyadan gələn şifahi təkliflər mövcuddur. Növbəti mərhələdə nə baş verəcəyini gözləyirik”.-deyə o qeyd edib.
71 yaşlı portuqaliyalı mütəxəssisin “ən-Nəsr”dən ayrılmasından sonra klub onun yerinə “Tottenhem”in sabiq çalışdırıcısı, avstraliyalı Anj Postekoqlunu gətirmişdi. Səudiyyəli futbol funksionerləri isə 2026-cı il dünya çempionatında qrup mərhələsində mübarizəni dayandıran millini yerli futbol mühitinə yaxşı bələd olan bir məşqçiyə tapşırmaq niyyətindədirlər.
Jezus Səudiyyə Ərəbistanında həm “əl-Hilal”, həm də “ən-Nəsr”lə böyük uğurlar qazandığı üçün bu posta ən real namizəd sayılır. Lakin yayılan iddialara görə, təcrübəli mütəxəssis hazırda ABŞ, Kanada və Meksikanın birgə ev sahibliyi etdiyi mundialdan sonra Braziliya və ya Portuqaliya millilərində yarana biləcək boşluğu gözləyir və karyerasını nəhəng yığmalardan birində tamamlamaq istəyir.
