Niderland-Mərakeş-Misir əsilli məşhur supermodel İman Həmam (Imaan Hammam) Fransanın lüks moda evi “Jacquemus”un Korsika adasındakı tarixi “Phare de la Pietra” mayakının ətəklərində keçirilən “Le Bonheur” (Xoşbəxtlik) adlı yaz/yay 2027 dəb nümayişində podiuma çıxıb. Aralıq dənizinin möhtəşəm mənzərəsində reallaşan bu eksklüziv şouda İman Həmam kolleksiyanın dəniz sahilindən ilhamlanaraq hazırlanan minimalist, xalis ağ rəngli unikal libasını nümayiş etdirib. 2013-cü ildə Parisdə “Jean Paul Gaultier”in yüksək dəb (couture) şousu ilə karyerasına başlayan və bu gün “Chanel”, “Versace”, “Prada”, “Balenciaga” kimi nəhənglərin siması olan model, podiumdakı peşəkarlığı ilə növbəti dəfə dəb dünyasını heyran qoyub.
ArabAZ yazır ki, Dəb arenasında uğurla addımlayan İman Həmam, eyni zamanda futbol üzrə dünya çempionatında tarixi uğura imza atan Mərakeş milli komandasına olan böyük dəstəyi ilə də diqqət çəkib. Belə ki, Monterreydə keçirilən və əsas vaxtı 1:1 hesabı ilə başa çatan dramatik oyunda Mərakeş yığmasının Niderlandı penalti seriyasında məğlub edərək 1/16 mərhələsinə yüksəlməsini model böyük coşqu ilə qarşılayıb. Özünün rəsmi İnstaqram hesabında paylaşım edən ulduz model, “Cəmi 3 saatlıq yuxu ilə qalmışam, amma mənəvi olaraq tamamilə enerji doluyam. Çünki Mərakeş qazandı və mən evə gedirəm” sözləri ilə sevincini milyonlarla izləyicisi ilə bölüşüb. Bundan əvvəl Mərakeşin Bostonda Şotlandiyaya 1:0 hesabı ilə qalib gəldiyi qrup matçını da stadiondan canlı izləyən və Braziliya ilə heç-heçədən sonra komandası ilə fəxr etdiyini bildirən İman Həmam, hər zaman olduğu kimi öz ərəb və Şimali Afrika köklərini qlobal platformalarda qürurla təmsil etməyə davam edir.
