Mərakeş milli komandasının baş məşqçisi Məhəmməd Vəhbi, 2026-cı il FIFA Dünya Kubokunda komandasının 1/16 final (round of 32) mərhələsinə yüksəlməsindən sonra iddialı bəyanatla çıxış edib. ArabAZ xəbər verir ki,o, futbolçularını çempionluğa inanmağa çağırıb.
“Atlas şirləri” C qrupundakı son qarşılaşmada Haiti yığmasını 4:2 hesabı ilə məğlub edərək qrup mərhələsini 7 xalla, məğlubiyyətsiz tamamlayıblar. Mərakeş qrupu yalnız top fərqinə görə Braziliyadan geridə – ikinci sırada bitirib və növbəti mərhələdə F qrupunun qalibi ilə üz-üzə gələcək.
Qələbədən sonra danışan Vəhbi, Mərakeşin artıq istənilən rəqiblə mübarizə aparmaq üçün güclü heyətə, texniki korpusa və azarkeş dəstəyinə sahib olduğunu bildirib:
“Rəqibin kimliyindən asılı olmayaraq, bizim güclü heyətimiz, mükəmməl kadrlarımız və möhtəşəm azarkeşlərimiz var. Özümüzə inanmaq üçün hər şeyə sahibik. Mərakeş futbolu artıq yeni mərhələyə qədəm qoyub; futbolçular öz keyfiyyətlərinə inanır, rəqiblər isə bizə böyük hörmətlə yanaşırlar. Bu səbəbdən hədəfimiz Dünya Kubokunu qazanmaq olmalıdır.”
Məşqçi xatırladıb ki, Mərakeş 2022-ci ildə Qətərdə keçirilən Dünya Kubokunda yarımfinala yüksələrək bu uğura imza atan ilk Afrika və ərəb ölkəsi olub. Onun fikrincə, həmin tarixi nailiyyət komandanın özünəbaxışını və rəqiblərin onlara qarşı münasibətini köklü şəkildə dəyişib. Bununla belə, Vəhbi əminliyin lovğalığa çevrilməməli olduğunu, hər bir rəqibə hörmətlə yanaşmağın və səhvləri düzəltməyin vacibliyini vurğulayıb. Haiti ilə oyunda müdafiədə bəzi boşluqların olduğunu etiraf edən mütəxəssis, növbəti matça qədər bu nöqsanları analiz edib aradan qaldıracaqlarını qeyd edib.
Tarixi Monterrey şəhərinə qayıdış
Mərakeş millisi 1/16 final oyununu Meksikanın Monterrey şəhərində keçirəcək. Bu şəhər ölkənin Dünya Kuboku tarixində çox mühüm mənəvi və tarixi əhəmiyyətə malikdir.
“Atlas şirləri” 1986-cı ildə Meksikada təşkil olunmuş Dünya Kubokunda ilk oyununu məhz Monterreydə Polşaya qarşı keçirmişdi. Həmin turnirdə Mərakeş İngiltərə və Portuqaliyanın da yer aldığı qrupda birinci yeri tutaraq Dünya Kubokunda pley-off mərhələsinə vəsiqə qazanmış ilk Afrika ölkəsi kimi tarixə düşmüşdü. Komanda pley-offda Qərbi Almaniyaya minimum hesabla uduzmuşdu. İndiki nəsil eyni ölkədə yeni bir tarixi uğura imza atmaq niyyətindədir.
Qeyd edək ki, Mərakeş 2026-cı il Dünya Kubokuna Braziliya ilə 1:1 hesablı heç-heçə ilə başlayıb, ardınca Şotlandiyanı 1:0, Haitini isə 4:2 hesabı ilə məğlub edib. Qrup mərhələsində rəqib qapılarına 6 qol vuran komanda öz qapısında 3 qol görüb.
