Qətərin daşınmaz əmlak sektoru 2026-cı ilin yanvar-mart (I rüb) ayları ərzində ümumi dəyəri 12.966 milyard Qətər rialı (QR) olan 426 ipoteka əməliyyatı qeydə alıb. Qətər Ədliyyə Nazirliyinin rəsmi məlumatlarına görə, Doha bələdiyyəsi 238 əməliyyatla (ümumi ipoteka yüklü əmlakların 55.9 faizi) ən yüksək göstəriciyə imza atıb.
ArabAZ xəbər verir ki, ondan sonrakı pillələrdə 70 əməliyyatla (16.4 faiz) Əl-Rayyan, 36 əməliyyatla (8.5 faiz) isə Əl-Daayen və Umm Səlal bələdiyyələri qərarlaşıb.
Müqayisə üçün qeyd edək ki, 2025-ci ilin birinci rübündə 434 ipoteka əməliyyatı çərçivəsində 10.037 milyard rial rəsmiləşdirilmişdi. Cari ilin ilk rübündə ipoteka maliyyələşməsinin həcminə görə Doha bələdiyyəsi 9.311 milyard rialla yenidən birinci yeri tutub. Ən aşağı maliyyə göstəricisi 13.914.000 rialla Əl-Şamal bələdiyyəsində qeydə alınıb, Əl-Şihaniyə bələdiyyəsində isə heç bir ipoteka əməliyyatı aparılmayıb.
Dövlət hesabatı göstərir ki, ipoteka yüklü əmlakların sayının maliyyə həcminə olan nisbəti Doha və Əl-Xor bələdiyyələri istisna olmaqla, bütün digər inzibati bölgələrdə say üstünlüyü ilə xarakterizə olunub. Lakin ilk rüb ərzində qeydə alınan ən bahalı ilk 10 əmlakın ipoteka həcmi ölkə üzrə reallaşan ümumi rüblük əməliyyat dəyərinin 52 faizini təşkil edib. Bu ilk onluğa daxil olan əmlakların 6-sı Dohada, 1-i isə Əl-Rayyanda yerləşir.
Rəsmi statistika Qətər iqtisadiyyatının və onun əsas sütunlarından biri olan daşınmaz əmlak sektorunun dayanıqlı inkişafını nümayiş etdirir. Bazarda müşahidə olunan bu aktiv canlanma və sabit artım xüsusilə son dövrlərdə qəbul edilmiş mühüm qanunvericilik aktları ilə bağlıdır:
Daşınmaz əmlak brokerliyi (vasitəçilik) fəaliyyətinin tənzimlənməsi;
Əmlak qeydiyyatı, sənədləşdirmə və notarial prosedurların sadələşdirilməsi;
Xarici və yerli kapitalın cəlb edilməsi, əmlaka mülkiyyət və istifadə (daimi icarə) hüquqlarının genişləndirilməsi.
İnfrastruktur layihələrinin genişləndirilməsi və dövlət inkişaf proqramları sayəsində Qətər daşınmaz əmlak bazarının uzunmüddətli perspektivdə qlobal investorlar üçün cəlbedici qalacağı proqnozlaşdırılır.
