Qətərin Baş naziri və xarici işlər naziri Şeyx Məhəmməd bin Əbdülrəhman bin Casim Əl Tani “Financial Times” qəzetinə verdiyi müsahibədə ölkəsinin maye təbii qaz (LNG) hasilatını “bir neçə həftə ərzində” normal səviyyəyə qaytarmağı planlaşdırdığını bəyan edib.
ArabAz xəbər verir ki, hökumət başçısı müharibə dövründə İranın hücumları, son günlərdə isə sənaye qəzası nəticəsində baş verən partlayış səbəbindən zərər görən flaqman “Ras Laffan” qaz kompleksi istisna olmaqla, digər sahələrdə işlərin sürətlə bərpa ediləcəyini bildirib. Qətərin dövlət enerji şirkəti “QatarEnergy”, Hörmüz boğazında naviqasiya təhlükəsizliyi təmin edilən kimi tammiqyaslı fəaliyyətə qayıtmağa hazırlaşır.
Fors-major vəziyyəti təhlükəsizlik tam təmin olunduqdan sonra ləğv ediləcək
Şeyx Məhəmməd qeyd edib ki, dayandırılmış LNG tədarükləri ilə bağlı elan edilmiş fors-major (fövqəladə və qarşısıalınmaz hallarda müqavilə öhdəliklərindən hüquqi azad olunma) statusu yalnız “QatarEnergy” rəhbərliyi bütün texniki problemlərin aradan qaldırıldığına və infrastrukturun tam təhlükəsiz fəaliyyət göstərəcəyinə əmin olduqdan sonra ləğv ediləcək.
Qlobal maye qaz bazarının təxminən beşdə birini (20%) təmin edən Qətər, ABŞ və İsrailin İrana qarşı başlatdığı hərbi əməliyyatlardan sonra regionda yaranmış gərginlik səbəbindən Hörmüz boğazı vasitəsilə ixracı və istehsalı müvəqqəti dayandırmışdı.
İndi isə tərəflər arasında əldə olunmuş çərçivə razılaşması çərçivəsində, İsveçrədə aparılan danışıqlarda ABŞ və İran arasında birbaşa qaynar xəttin (hotline) qurulması müzakirə edilir. Baş nazirin sözlərinə görə, bu qaynar xətt dezinformasiyaların qarşısını almaq və Hörmüz boğazından keçən gəmilərin təhlükəsizliyini təmin etmək üçün həyati əhəmiyyət kəsb edir.
