Misirli tanınmış aktrisa Səlma Əbudeyf baş rolunu populyar aktyor və müğənni Diab ilə paylaşdığı yeni “Benc Külli” (Bex Kolly / Ümumi Narkoz) serialı ilə televiziya ekranlarına qayıtmağa hazırlaşır. Layihənin prodüser şirkəti serialın ilk rəsmi afişasını (posterini) yayımlayaraq, ekran işinin tezliklə “Shahid” rəqəmsal platforması və “MBC” telekanalında rəsmən yayımlanacağını elan edib.
ArabAZ xəbər verir ki, sosial-dram janrında çəkilən serialın süjet xətti bir xəstəxananın daxilində cərəyan edir. Ekran əsərində çətin və gərgin tibbi şəraitdə həkimlərlə xəstələr arasında yaranan münasibətlər, həyati qərarlar və müxtəlif insan hekayələri dramatik və detektiv elementlərlə tamaşaçıya təqdim olunur.
Səlma Əbudeyf serialda gənc bir həkim obrazını canlandırır. Misir kinosunun veteran aktyorlarından olan Kamal Əburiyə isə ekran işində Səlmanın atasını oynayır. Bu tərəfdaşlıq xəstəxana daxilindəki tibbi hadisələrlə kəsişən maraqlı bir ailə dramının yaranmasına zəmin hazırlayır. Aktyor Diab da layihədə həkim obrazı ilə çıxış edir və hadisələr inkişaf etdikcə personajlar arasında müxtəlif gərgin proseslər yaşanır.
Son illər canlandırdığı fərqli xarakterlərlə həm tamaşaçıların, həm də kino tənqidçilərinin rəğbətini qazanan Səlma Əbudeyfin bu performansı böyük maraqla gözlənilir. Rolun təbiəti aktrisadan həm peşəkar reallığı, həm də dərin insani duyğuları eyni vaxtda nümayiş etdirməyi tələb edir.
Layihənin digər baş rol ifaçısı Diab öz rəsmi Feysbuk (Facebook) hesabı vasitəsilə serialın rəsmi posterini paylaşaraq yerli ləhcədə belə bir şərh yazıb: “Tezliklə ‘MBC’ və ‘Shahid’ platformasında yayımlanacaq ‘Benc Külli’ serialında məni gözləyin… Və narkozun təsiri altında deyiləcək bəzi sözlərə özünüzü hazırlayın”.
15 seriyadan ibarət olan “Benc Külli” serialının aktyor heyətinə Ola Rüşdi, Məhəmməd Mehran, Səlva Məhəmməd Əli, Möhsin Möhiddin, Hənin Səid, Yasmin Rəhmi, Lubna Vəns və Həlim Əl-Cəndi kimi tanınmış ərəb aktyorları daxildir. Serialın ssenari müəllifi Məhəmməd Süleyman Əbdülmalik, quruluşçu rejissoru Nadin Xan, baş prodüseri isə Abdulla Əbülfutuhdur.
