Səudiyyə Ərəbistanında gənclər arasında sosiallaşma vərdişləri köklü şəkildə dəyişir. Uzun illərdir davam edən ənənəvi kafe və restoran görüşləri artıq yerini dulusçuluq (saxsı qab) emalatxanalarına, kulinariya dərslərinə, şam hazırlama seanslarına və kvest otaqlarına (escape rooms) verir. Ölkə daxilində fəaliyyət göstərən interaktiv biznes sahələri sürətlə genişlənir.
ArabAZ xəbər verir ki, indi dost qrupları sadəcə qəhvə içmək üçün deyil, birlikdə nəsə hazırlamaq, yaratmaq və ya müəyyən məsələləri həll etmək üçün toplaşırlar. Bu sahədə fəaliyyət göstərən müəssisələr fərqli olsa da, onların əsas ideyası eynidir: istehlakçılar artıq passiv əyləncə üçün deyil, prosesdə birbaşa iştirak etmək üçün pul ödəyirlər.
“Vizyon 2030” və sevimli məşğuliyyət klubları
Bu yeni trend Səudiyyə Ərəbistanının “Vizyon 2030” (Vision 2030) proqramı çərçivəsində mədəniyyət, istirahət və əyləncə imkanlarının genişləndirilməsi strategiyasına tam uyğundur. Krallıq “Həyat Keyfiyyəti Proqramı” vasitəsilə vətəndaşların asudə vaxtlarını səmərəli keçirmələrini hədəfləyir və bu sahədə özəl sektorun investisiyalarını dəstəkləyir. Proqramın əsas layihələrindən biri olan “Hawi” milli platforması ölkə daxilində maraq klublarının yaradılmasını təşviq edir. Son illik hesabata görə, Səudiyyə Ərəbistanında artıq 215-dən çox hobbi növünü əhatə edən 1145 qeydiyyatdan keçmiş klub fəaliyyət göstərir. 2030-cu ilə qədər bu rəqəmin 6 minə çatdırılması planlaşdırılır.
24 yaşlı Nora əd-Dosari üçün bu emalatxanalar gündəlik monoton həyatı dəyişmək üçün mühüm vasitəyə çevrilib.
“Bir müddət həyatım yalnız iş, ev və telefonda sosial şəbəkələri izləməkdən ibarət idi. Alxobardakı ‘Tarfay’ icma məkanında dərslərə qoşuldum. Bura mənə evdən çıxmaq və yeni insanlarla tanış olmaq üçün gözəl bəhanə verdi. İnsanlar bura rəssam olmaq üçün gəlmirlər, onlar sadəcə birlikdə paylaşa biləcəkləri real təcrübə axtarırlar”. –deyə o bildirib.
Dammamdakı “Kleos” saxsı studiyasında dulusçuluq dərslərinə qatılan Qada ət-Təmimi isə bu məşğuliyyətin ona daxili sakitlik bəxş etdiyini bildirib. O qeyd edib ki, emalatxanada işlədiyi iki saat ərzində iş barədə, telefon bildirişləri və ətrafdakı gərginlik haqqında tamamilə unudur. Onun hazırladığı ilk saxsı fincan hazırda evindədir. “O mükəmməl deyil və mən mağazadan daha ucuzunu və yaxşısını ala bilərdim. Lakin mən fincana deyil, onu öz əllərimlə hazırlamaq təcrübəsinə pul ödəmişəm”, – deyə o vurğulayıb.
Sosial şəbəkələr, xüsusilə TikTok və Instagram platformaları bu interaktiv biznes sahələrinin populyarlaşmasını daha da sürətləndirir. Şam istehsalı, tort bəzədilməsi və ya dulusçuluq videoları milyonlarla baxış toplayır. Bir neçə il əvvəl axşam görüşü dedikdə yalnız restoran seçimi nəzərdə tutulurdusa, bu gün səudiyyəli gənclər birlikdə nəsə yaratmaq, xatirələr qurmaq və canlı ünsiyyət üçün pul ödəməyə üstünlük verirlər.
