Dəməşqdəki Dördüncü Cinayət Məhkəməsi Suriyanın keçmiş Bəşər Əsəd rejiminə qarşı keçirilən açıq məhkəmə prosesinin ikinci iclasına başlayıb. Məhkəmə devrilmiş rejimin ən yüksək rütbəli simalarını mülki hüquqlardan məhrum etmək və onların bütün daşınar və daşınmaz əmlaklarını hökumətin idarəçiliyinə vermək barədə hüquqi qərar çıxarıb.
ArabAZ xəbər verirr ki, qərarla Bəşər Əsəd, Mahir Əsəd, Fəhd əl-Freyc, Məhəmməd Əyyuş, Luay əl-Əli, Qusay Mihub, Vafiq Nasir və Talal əl-Asimi bütün mülki hüquqlarını itiriblər. Bu hökm aprel ayındakı ilk iclasın davamı olaraq qiyabi şəkildə verilib, çünki sözügedən şəxslər məhkəməyə dəvət edilmələrinə baxmayaraq, irəli sürülən ağır ittihamlara cavab vermək üçün ədalət qarşısına çıxmayıblar.
Eyni zamanda, Dəməşq Ədliyyə Sarayında keçmiş rejimin 2025-ci ilin yanvarında Laziqiyədə tutulan ilk yüksək rütbəli rəsmisi Atif Nəcibin mühakiməsi davam edir. Hakim Fəxrəddin əl-Uryan iclasın gedişatında Nəcibə qarşı zaman aşımı olmayan 10-dan çox ağır ittiham irəli sürüb. Bu ittihamlar arasında Dəra şəhərində dinc etirazların yatırılması, məhbuslara və azyaşlılara qarşı dırnaqların qopardılması, elektrik şoku kimi ağır işgəncələrin verilməsi, sistemli ölümlərə yol açan əməllər və Öməri məscidindəki qətliamın birbaşa əmrlərini vermək yer alır.
Hakim qeyd edib ki, Nəcib və hazırda qaçan digər müttəhimlərin əməlləri mülki şəxslərə qarşı genişmiqyaslı hücum xarakteri daşıdığı üçün Cenevrə konvensiyalarına və beynəlxalq humanitar hüquqa əsasən müharibə cinayətləri kimi tövsif edilib. Məhkəmədə Dəra şəhərindən olan 80-ə yaxın zərərçəkmiş, o cümldən təhlükəsizlik səbəbindən şəxsiyyəti gizli saxlanılan şahidlər iddialarını təqdim ediblər. İclasda qurbanların ailələri ilə yanaşı, “Milli Keçid Ədaləti Heyəti”nin üzvləri və beynəlxalq hüquq müdafiə təşkilatlarının nümayəndələri də iştirak ediblər. Xatırladaq ki, Əsəd rejimi simalarının mühakimə olunduğu ilk tarixi iclas bu il aprelin 26-da keçirilmişdi.
