Abu Dabi, Yas adasında inşa ediləcək və təxminən 1,7 milyard dollara başa gələcək möhtəşəm “Sphere Abu Dhabi” layihəsi ilə özünün dünya səviyyəli destinasiya imicini daha da möhkəmləndirir. Abu Dabi Mədəniyyət və Turizm Departamenti (DCT Abu Dhabi) və “Sphere Entertainment Co.” arasındakı tərəfdaşlıq çərçivəsində hazırlanan bu layihə, “Sphere” arenası modelinin ABŞ-dan kənarda ilk qlobal genişlənməsi kimi tarixə düşür.
ArabAZ xəbər verir ki, “Yas Mall” ilə “SeaWorld Abu Dhabi” arasında, yaşıl mühitdə yerləşəcək bu arena adanın mövcud əyləncə parkları və attraksionlar şəbəkəsinə yaxın olacaq. Tikintinin 2029-cu ilin sonuna qədər başa çatdırılması hədəflənir.
DCT Abu Dabi sədri Mohamed Khalifa Al Mubarakın sözlərinə görə, bu layihə əmirliyin uzunmüddətli vizyonunun göstəricisidir. O, bu investisiyanı Abu Dabinin iddialı və dünyaya açıq olmasının bariz siqnalı, həmçinin yerli istedad və mədəniyyətin qlobal səhnəyə çıxarılması üçün bir fürsət kimi xarakterizə edib: “Birlikdə biz onilliklər boyu ziyarətçiləri, yaradıcıları və investorları Yas adasına cəlb edəcək bir məkan yaradırıq”, – deyə o bildirib.
“Sphere Entertainment”in rəhbəri Ceyms L. Dolan Abu Dabini dünya səviyyəli infrastrukturu və beynəlxalq statusuna görə bu arena üçün təbii bir ünvan adlandırıb. “Sphere Abu Dhabi” immersiv (hərtərəfli təsir bağışlayan) məkanların qlobal şəbəkəsinin qurulmasında ilk addım hesab olunur.
Arena üç növ tədbirə ev sahibliyi edəcək: “Sphere Experiences” adlı multi-sensorlu rəqəmsal tamaşalar; həm yerli ərəb ulduzlarının, həm də beynəlxalq sənətçilərin konsertləri; məhsul təqdimatlarından tutmuş döyüş idman növlərinə qədər iri miqyaslı brend tədbirləri. 20 000 nəfərlik tutuma malik olan arena müxtəlif formatlı tədbirlər üçün çevik dizayna sahibdir.
Mədəniyyət baxımından arena Əmirliklərin irsini nümayiş etdirəcək. Binanın ikona çevrilən nəhəng kürəşəkilli LED fasadında (“Exosphere”) yerli sənət nümunələri nümayiş olunacaq. Zayed Beynəlxalq Hava Limanının yaxınlığında yerləşməsi arenanın həm də hər il keçirilən “Formula 1” Abu Dabi Qran Prisi zamanı möhtəşəm bir vizual fon kimi bütün dünya tərəfindən görünməsini təmin edəcək.
Bu layihə Abu Dabinin portfelində olan Sədiyyat Mədəniyyət Bölgəsi və gələcək “Disney” əyləncə parkı kurortu kimi nəhəng işlər sırasına daxildir. “Sphere Abu Dhabi” fəaliyyətə başladıqdan sonra minlərlə daimi iş yerinin yaradılması gözlənilir.
