Səudiyyə Ərəbistanı bu ilki Həcc mövsümü üçün bütün hazırlıqlarını tamamlayıb. Dünyanın müxtəlif yerlərindən gələn zəvvarların şənbə günündən etibarən ölkəyə daxil olması gözlənilir. Krallıq zəvvarların ibadətlərini rahat və təhlükəsiz şəkildə yerinə yetirmələri üçün inteqrasiya olunmuş xidmətlər paketini işə salıb.
ArabAZ xəbər verir ki, Səudiyyə Ərəbistanı Pasportlar Baş İdarəsi bu gün yaydığı bəyanatda bütün beynəlxalq hava, quru və dəniz limanlarının zəvvarları qəbul etməyə hazır olduğunu, prosedurların operativ və rəvan şəkildə həyata keçiriləcəyini təsdiqləyib.
Texnoloji dəstək və inteqrasiya olunmuş xidmətlər
İdarə zəvvarların ölkəyə girişini asanlaşdırmaq üçün bütün imkanların səfərbər edildiyini bildirib. Buraya limanlardakı platformaların ən müasir texnoloji cihazlarla təchiz edilməsi və müxtəlif dillərdə danışan ixtisaslı kadrların cəlb olunması daxildir.
Şənbə günü ilk zəvvar reysinin enişi ilə birlikdə, rəhbərliyin göstərişinə uyğun olaraq qonaqlara təhlükəsiz və asan təcrübə yaşatmaq üçün tam mütəşəkkil sistem fəaliyyətə başlayacaq. Uçuşların axını mayın 18-nə (Zilhiccə ayının əvvəlinə) qədər davam edəcək.
Zəvvarlara dair təlimatlar və “Nusuq” kartı
Həcc Nazirliyi zəvvarlara müxtəlif dillərdə hazırlanan rəqəmsal maarifləndirici vəsaitlərdən istifadə etməyi tövsiyə edib.
Nazirlik zəvvarları aşağıdakı qaydalara əməl etməyə çağırıb:
Uçuş vaxtlarına ciddi riayət etmək və az baqajla səyahət etmək;
Yüksək məbləğdə pul və ya xüsusi dərmanlar barədə gömrük bəyannaməsi vermək;
Səyahət sənədlərini və vizanı hazır saxlamaq;
Tibbi reseptləri və hesabatları özü ilə götürmək.
Nazirlik bu il də “Nusuq” (Nusuk) kartının tətbiqini davam etdirir. Həm fiziki, həm də “Nusuk” və “Tawakkalna” tətbiqlərində rəqəmsal formada mövcud olan bu kart zəvvarlara geniş xidmətlər spektrindən yararlanmaq imkanı verir.
“Baqajsız hacı” təşəbbüsü
Zəvvarların rahatlığını təmin etmək üçün “Baqajsız hacı” xidməti də təklif olunur. Bu xidmət vasitəsilə zəvvarlar öz əşyalarını ölkələrindən birbaşa Məkkə və ya Mədinədəki yaşayış yerlərinə göndərə, Həcc ziyarəti bitdikdən sonra isə təkrar geri şaxın edə bilərlər. Bu təşəbbüs zəvvarın ağır yük daşımadan daha rahat hərəkət etməsini, baqajın təhlükəsizliyini və izlənilməsini təmin edir.
Təyyarə ilə səyahət edənlərə isə tövsiyə olunur ki, əgər birbaşa Məkkəyə gedirlərsə, təyyarəyə minməzdən əvvəl ehram geyinsinlər və mikat həddindən keçərkən niyyət edib “təlbiyə” duasını oxumağa diqqət yetirsinlər.
