Qətərin Vəqflər və İslam İşləri Nazirliyi (Avqaf) 2026-cı il Həcc mövsümü ərəfəsində bir daha bəyan edib ki, rəsmi icazə sənədi (permit) olmadan müqəddəs ziyarətin həyata keçirilməsi qətiyyən yolverilməzdir. Nazirlik zəvvarları Səudiyyə Ərəbistanının müəyyən etdiyi hüquqi qaydalara ciddi şəkildə əməl etməyə çağırıb.
ArabAZ xəbər verir ki,Nazirliyin açıqlamasında bildirilir ki, yalnız Avqaf tərəfindən təsdiqlənmiş və lisenziya almış rəsmi Həcc kampaniyaları vasitəsilə icazə alan şəxslər ritualları yerinə yetirə bilər. Rəsmi icazəsi olmayan şəxslərin müqəddəs yerlərə girişi Səudiyyə Ərəbistanı hakimiyyəti tərəfindən qadağan ediləcək və bu qaydanı pozanlar ciddi cərimələr, deportasiya və Krallığa giriş qadağası ilə üzləşəcəklər.
Avqaf həmçinin vurğulayıb ki, icazə sistemi zəvvarların təhlükəsizliyini təmin etmək, izdihamı idarə etmək və xidmət keyfiyyətini qorumaq üçün həyati əhəmiyyət kəsb edir. Nazirlik bütün zəvvarlara rəsmi kanallarla müqavilə bağlamağı və saxta vədlər verən qeyri-qanuni vasitəçilərdən uzaq durmağı tövsiyə edib.
