Bakı,AzerVoice
Premyer Liqanın lideri olan Liverpul bu mövsüm titul qazansa, Məhəmməd Salahın Qızıl top qazanmaq şansı xeyli artacaq.
AzerVoice xəbər verir ki, 32 yaşlı misirli ulduz, bu mövsüm möhtəşəm çıxışı ilə futbolun ən nüfuzlu fərdi mükafatı sayılan "Qızıl top"un əsas favoritlərindən biridir.
Salah cari mövsümdə bütün turnirlərdə 30 qol vurub və 21 məhsuldar ötürmə edib. Lakin hələ də Enfielddə qalmaq üçün yeni müqavilə imzalamayıb.
Buna baxmayaraq, Liverpulun baş məşqçisi Slot çərşənbə axşamı qeyd edib ki, bu statistika kifayət deyil, Salahın ilk "Qızıl top"unu qazanması üçün klubun böyük titullar əldə etməsi vacibdir.
Premyer Liqada ən yaxın izləyicisi "Arsenal"ı 11 xalla qabaqlayan Liverpulun liqada 11 oyunu qalıb. Komanda çərşənbə günü Nyukaslla qarşılaşacaq. Slot qeyd edib ki, oyunçular uzun müddətdir bu səviyyədə çıxış etdiyindən, arxayınlaşma təhlükəsi görmür.
Slot mətbuat konfransında Salahın hazırkı formasının Kriştiano Ronaldo və Lionel Messinin zirvə dövrləri ilə müqayisə edilə biləcəyini soruşduqda birbaşa müqayisədən qaçıb.
"O, Liverpulda bir neçə möhtəşəm mövsüm keçirdi və ümid edirik ki, bu performansı uzun müddət davam etdirə bilər. Əlbəttə, bunu etmək üçün ilk növbədə müqaviləsini uzatmalıdır",- deyə o bildirib.
