BAKI, AzerVoice, Fərid Mikayıılov
İspaniyanın nəhəng futbol klubu Barselona Kamp Nounun təmirindəki gecikmələr səbəbindən Montjuic stadionuna köçməyə məcbur olub.
AzerVoice xəbər verir ki, bu qərar klub üçün ciddi maliyyə yükü yaradır.
Klubun vitse-prezidenti Elena Fortun açıqlamasına görə, hər oyun Montjuic stadionunda Barselonaya 300 min – 900 min avro arasında xərcə başa gəlir. Orta hesabla yarım milyon avro xərclənməsi, klubun onsuz da gərgin olan büdcəsinə əlavə təzyiq yaradır.
Barselona La Liqanın növbəti matçını Real Sosyedada qarşı Montjuicdə keçirəcək. Klubun əsas stadionu Kamp Nouda təmir işləri 2023-cü ilin iyununda başlanıb və 1,5 milyard avroluq modernləşdirmə layihəsi çərçivəsində tutumun 105 min nəfərə qədər artırılması nəzərdə tutulur. Stadionun 2024-cü ilin noyabrında – klubun 125 illik yubileyində açılması planlaşdırılsa da, lisenziyaların alınması, yanğın təhlükəsizliyi yoxlamaları və digər icazələr prosesin uzanmasına səbəb olub.
Montjuic stadionunun 55 min nəfərlik tutumu klubun mövsüm ərzində böyük oyunları qəbul etməsinə imkan verir. Burada PSJ ilə Çempionlar Liqası qarşılaşması da keçiriləcək. Kamp Nounun isə ən azı 18 oktyabrda Jirona ilə oyunda istifadəyə verilməsi gözlənilir.
Klub, həm idman məqsədləri, həm də maliyyə baxımından bu çətin dövrü idarə etməyə çalışır. Lakin gecikmələr nəticəsində Montjuicdə keçiriləcək hər oyun Barselonanın maliyyə yükünü daha da artırır.
