BAKI,AzerVoice, Fərid Mikayılov
İngiltərənin Mançester Siti klubu Premyer Liqadakı rəqibi “Bornmut”dan qanalı cinah hücumçusu Antuan Semenyonun transferini rəsmən elan edib.
AzerVoice xəbər verir ki, klubun yaydığı məlumata görə, 25 yaşlı futbolçu ilə uzunmüddətli müqavilə imzalanıb və Semenyo 2031-ci ilin yayına qədər “Etihad” stadionunun təmsilçisi olacaq.
Transferin əsas məbləği 62,5 milyon funt sterlinq (təxminən 84 milyon ABŞ dolları) təşkil edir. Müəyyən hədəflərin yerinə yetirilməsi halında bu məbləğin əlavə 1,5 milyon funt artması da mümkündür.
Semenyo klubun rəsmi saytına açıqlamasında bu keçidi karyerasında mühüm mərhələ kimi dəyərləndirib.
“Mançester Sitiyə qoşulduğum üçün çox qürur duyuram. Son on ildə Pep Qvardiolanın rəhbərliyi altında bu komandanı izləyirdim. Onlar Premyer Liqada dominant olub, Çempionlar Liqası, İngiltərə Kuboku və Liqa Kubokunda möhtəşəm uğurlar qazanıblar”- deyə o bildirib.
