BAKI,VOA

İsrailin Baş naziri Benyamin Netanyahu yeraltı sığınacaqda keçirdiyi mətbuat konfransında İranla müharibənin gedişatı barədə mühüm bəyanatlar verib. Baş nazir müharibənin 20-ci günündə İranın nüvə və raket potensialının böyük ölçüdə məhv edildiyini, İsrailin artıq regional fövqəldövlətə çevrildiyini bildirib.

VOA xəbər verir ki, Qətərin "Əl-Cəzirə" telekanalının məlumatına görə, Netanyahu çıxışı zamanı mümkün raket zərbələri təhlükəsi səbəbindən mətbuat konfransını xüsusi mühafizə olunan yeraltı bunkerdə keçirib.

Netanyahu qeyd edib ki, 20 günlük intensiv hərbi əməliyyatlardan sonra İranın strateji imkanları iflic vəziyyətindədir.

"Sizə müjdə verə bilərəm ki, İranın artıq uranı zənginləşdirmək və ya ballistik raketlər istehsal etmək qabiliyyəti qalmayıb. Bizim hədəfimiz İranın raketlərini, nüvə layihəsini tamamilə ləğv etmək və xalqın rejimi devirməsi üçün şərait yaratmaqdır."-deyə o bildirib.

Baş nazir İsrail ordusunun və "Mossad"ın qarşısında duran yeni vəzifələri açıqlayıb. O, ötən gün İranın Xəzər dənizindəki donanmasının tamamilə məhv edildiyini bəyan edib.

"Mən orduya və 'Mossad'a göstəriş vermişəm ki, İran rejimi rəsmiləri hətta küçələrdə belə hədəf alınsın. Biz onlara həm havadan, həm dənizdən, həm də yerin altındakı sığınacaqlarda zərbələr endiririk."-deyə o qeyd edib.

Netanyahu Şərqi Aralıq dənizi və Yaxın Şərqin xəritəsini dəyişdirdiyini iddia edib. O, Hörmüz boğazı və Qırmızı dənizə alternativ yolların tapılmasının vacibliyini vurğulayıb. Həmçinin, İranın "Pars" qaz yatağına edilən hücum barədə danışarkən bildirib ki, İsrail bu məsələdə təkbaşına hərəkət edib, Tramp gələcəkdə bu cür (enerji obyektlərinə) hücumların dayandırılmasını xahiş edib.

İsrail xalqının sığınacaqlarda qalmasının orduya böyük dəstək verdiyini deyən Netanyahu, İran rejiminin süqutu ilə "Hizbullah"ın da yox olacağını vurğulayıb. O, hazırda İrana kimin rəhbərlik etdiyi barədə qeyri-müəyyənliyin olduğunu və Tehran rəhbərliyində ciddi problem yaşandığını qeyd edib. "İran minlərlə raketlə bizim qüllələri yıxacağını vəd edirdi, lakin indi Tehran və Beyrutun qüllələri yerlə-yeksan olur," – deyə Netanyahu əlavə edib.

Sonda Baş nazir qeyd edib ki, müharibə insanların düşündüyündən daha tez bitəcək və İsrail artıq qələbə astanasındadır.