BAKI,VOA, Nailə Babazadə

İran Xarici İşlər Nazirliyi ölkənin xarici siyasət idarəsinin rəhbəri Abbas Əraqçi ilə misirli həmkarı Bədr Əbdülati arasında telefon danışığının baş tutduğu barədə rəsmi məlumat yayıb. Tərəflər bölgədəki hərbi eskalasiyanın ağır nəticələrini və sülh imkanlarını dəyərləndiriblər.

VOA xəbər verir ki, İran XİN-in bəyanatına görə, Abbas Əraqçi misirli həmkarı ilə söhbətində ABŞ və İsrailin İrana qarşı həyata keçirdiyi hərbi təcavüzün bölgədə yaratdığı təhlükəli fəsadları geniş müzakirə edib. Əraqçi Tehranın bu hücumlara qarşı mövqeyini bir daha vurğulayıb.

Qahirənin de-eskalasiya səyləri

Misirin Xarici İşlər naziri Bədr Əbdülati öz növbəsində iranlı həmkarını Qahirənin son günlər həyata keçirdiyi diplomatik marafon barədə məlumatlandırıb. Nazir qeyd edib ki, Misir hökuməti bölgədə gərginliyi azaltmaq və hərbi əməliyyatların dayandırılmasına nail olmaq üçün regional və beynəlxalq tərəflərlə intensiv danışıqlar aparır.

Xatırladaq ki, fevralın 28-dən başlayan hərbi gərginlik fonunda Misir və Türkiyə Vaşinqtonla Tehran arasında əsas vasitəçi tərəflər kimi çıxış edir. Bu telefon danışığı Trampın 5 günlük möhlət qərarı və Tehranın təzminat tələbləri fonunda diplomatik rıçaqların hələ də masada olduğunu göstərir.