BAKI,VOA, Fərid Mikayılov
İran parlamentinin sədri Məhəmməd Baqir Qalibaf Hörmüz boğazı ilə bağlı açıqlama verərək, keçid qaydalarının sosial şəbəkələrdə deyil, real şəraitdə müəyyənləşdiyini bildirib.
VOA xəbər verir ki, Qalibaf özünün rəsmi “Telegram” hesabında etdiyi paylaşımda qeyd edib ki, Hörmüz boğazı üzərindən keçidlər İranın müəyyən etdiyi marşrut və icazə əsasında həyata keçirilir.
O vurğulayıb ki, boğazın açılıb-bağlanması və keçid rejimi “sosial mediada deyil, sahədə formalaşır”.
İran parlament sədri ABŞ-ın mümkün blokada siyasətinə də münasibət bildirərək, belə bir vəziyyətdə boğazın açıq saxlanmayacağını qeyd edib və keçidlərin İran Silahlı Qüvvələrinin nəzarətində olduğunu deyib.
Qalibaf həmçinin ABŞ prezidenti Donald Trampın açıqlamalarını tənqid edərək, onu yalan məlumat yaymaqda ittiham edib.
O əlavə edib ki, İran üçün zənginləşdirilmiş uran “milli və strateji dəyərə malikdir” və onun ölkədən çıxarılması mümkün deyil.
