BAKI,VOA, Fərid Mikayılov
İran Müdafiə Nazirliyinin sözçüsü Rza Telayi Nik ABŞ və İsrail tərəfindən həyata keçirildiyi iddia edilən hücumlar zamanı ölkənin raket gücünün mühüm hissəsinin istifadə olunmadığını bildirib.
VOA xəbər verir ki, Telayi Nik bu fikirləri qatıldığı televiziya proqramında səsləndirib və İranın hərbi imkanları ilə bağlı açıqlamalar verib.
O, ABŞ və İsrailin 28 fevralda İrana qarşı başlatdığı müharibədə uğursuz olduğunu və qarşıya qoyulan hədəflərə çata bilmədiyini iddia edib.
Telayi Nik İranın uzun illərdir raket sahəsində mühüm tədqiqatlar apardığını qeyd edib.
“İranda yerli imkanlarla müxtəlif sahələrdə 1000-dən çox silah istehsal olunur. Müharibə zamanı bəzi obyektlər zərər görsə də, silah istehsalı dayandırılmadı. Raket gücünün mühüm bir hissəsi istifadə olunmayıb”- deyə o bildirib.
İranlı sözçü həmçinin ölkəsinin müdafiə və hücum potensialının zəifləmədiyini, əksinə daha da gücləndiyini deyib.
