İraqın Baş naziri Əli əz-Zeydi ölkəsinin qonşu dövlətlərə qarşı hücumların həyata keçirildiyi əraziyə çevrilməsinə imkan verilməyəcəyini bildirib. O, Bağdadın bölgədə gərginliyin azaldılmasına və dialoqun təşviqinə töhfə verə biləcəyini vurğulayıb.

ArabAZ xəbər verir ki, Əli əz-Zeydi Fransanın “Le Figaro” qəzetində dərc olunan məqaləsində İraqın regional qarşıdurmaların genişlənməsinin qarşısının alınmasında rol oynamağa hazır olduğunu bildirib.

Baş nazirin sözlərinə görə, İraq “gərginliyin azaldılmasına və dialoq üçün yolların açılmasına” kömək edə bilər.

Açıqlama Səudiyyə Ərəbistanının Şərq-Qərb neft kəmərinə pilotsuz uçuş aparatı ilə hücumdan sonra Bağdad və Ər-Riyad arasında təhlükəsizlik məsələlərinin gündəmə gəldiyi bir vaxtda verilib.

İraq hakimiyyəti bazar günü təhlükəsizlik qüvvələrinin Səudiyyə Ərəbistanının strateji Şərq-Qərb neft kəmərinə hücumda istifadə edildiyi ehtimal olunan pilotsuz uçuş aparatlarının buraxılış qurğusunu ələ keçirdiyini açıqlayıb.

Səudiyyə Ərəbistanının Xarici İşlər Nazirliyi isə hücumdan sonra bildirib ki, Ər-Riyad İraq ərazisindən Səudiyyə Ərəbistanına və digər qonşu ölkələrə qarşı hücumların qarşısının alınması üçün Bağdada müvafiq tədbirlər görmək imkanı verəcək.