BAKI,AzerVoice
İsrailin baş naziri Benyamin Netanyahu bazar günü İsrail ictimaiyyətinə etdiyi müraciətdə İranın nüvə proqramının məhv edildiyini və bununla da öz vədini yerinə yetirdiyini bildirdi. O, ABŞ-ın bu gecə İrana qarşı həyata keçirdiyi hücumun İsraillə tam koordinasiyalı şəkildə aparıldığını qeyd etdi.
“Bir qədər əvvəl, ABŞ Prezidenti Donald Tramp ilə tam koordinasiya və İsrail ordusu ilə ABŞ ordusu arasında tam əməliyyat razılaşdırılması çərçivəsində, ABŞ İranın üç əsas nüvə obyektini – Fordo, Nətənz və İsfahanı vurdu.”-deyə Netanyahu televiziya ilə yayımlanan çıxışında bildirib.
O əlavə edib ki, İranla müharibənin əvvəlindən sizə söz verdiyi kimi , bu obyektləri bir yolla, ya da digər yolla məhv edəcək və bu vədi yerinə yetirildi.
Bu açıqlamalardan sonra İsrail Hava Limanları İdarəsi yeni hadisələr fonunda İsrail hava məkanının növbəti xəbərdarlığa qədər bağlandığını elan edib.
Xatırladaq ki, İsrail 13 iyun tarixində İrana hava zərbələri endirdikdən sonra hava məkanını bağlamış, cümə günü isə xaricdə ilişib qalmış israilliləri geri qaytarmaq üçün hava məkanını qısamüddətli açmışdı.
