Səudiyyə Ərəbistanının Əl-Racihi Bankı 6,23 faiz illik gəlirliliklə 600 milyon dollarlıq Tier 2 sosial sukuk emissiyasını uğurla tamamlayıb. 10,5 illik müddətə buraxılan sukuk üzrə hesablaşmanın sentyabrın 10-da aparılması planlaşdırılır.
ArabAZ xəbər verir ki,Emissiya hər birinin nominal dəyəri 200 min dollar olan 3 min etimad sertifikatından ibarətdir. Sertifikatlar 5 il 3 aydan sonra geri çağırıla bilər. Bu, Əl-Racihi Bankın beynəlxalq bazarda ikinci Tier 2 sosial sukuk emissiyasıdır. Bank 2025-ci ilin sentyabrında 1 milyard dollarlıq ilk belə emissiyanı həyata keçirib.
Yeni sertifikatların London Fond Birjasının Beynəlxalq Qiymətli Kağızlar Bazarında listinqə daxil edilməsi nəzərdə tutulur. Emissiya Səudiyyə Ərəbistanı və beynəlxalq bazarlardakı uyğun investorlar üçün nəzərdə tutulub. Bank sertifikatların buraxılması niyyətini sentyabrın 3-də açıqlayıb.
Əməliyyat Səudiyyə banklarının maliyyələşmə mənbələrini şaxələndirmək və tənzimləyici kapitalını gücləndirmək məqsədilə beynəlxalq borc bazarlarına daha fəal çıxışı fonunda həyata keçirilib. Ölkədə kredit artımı və iqtisadi transformasiya maliyyələşməyə tələbatı da artırır.
2025-ci ilin sentyabrında buraxılmış 1 milyard dollarlıq əvvəlki Tier 2 sosial sukuk üzrə illik gəlirlilik 5,65 faiz təşkil edib. 10,5 illik müddətə hesablanan həmin sertifikatlar beş ildən sonra geri çağırıla bilirdi və London Fond Birjasının Beynəlxalq Qiymətli Kağızlar Bazarında listinqə daxil edilmişdi.
Əl-Racihi Bankın 2026-cı ilin ilk yarısında xalis mənfəəti illik müqayisədə 14,2 faiz artaraq 13,76 milyard Səudiyyə riyalına (3,67 milyard dollar) çatıb. İyunun sonuna bankın aktivləri 1,05 trilyon riyal, maliyyələşdirmə portfeli 762,1 milyard riyal, müştəri depozitləri isə 688,4 milyard riyal olub.
