Səudiyyə Ərəbistanının 175 ölkədə həyata keçirdiyi humanitar, inkişaf və xeyriyyə layihələrinin ümumi dəyəri 145 milyard dolları ötüb. Ölkə 2025-ci ildə humanitar və yardım dəstəyi göstərən dövlətlər arasında dünyada ikinci, ərəb ölkələri arasında isə birinci yerdə qərarlaşıb.
ArabAZ xəbər verir ki,Səudiyyə Ərəbistanının beynəlxalq yardım fəaliyyətində əsas rolu 2015-ci ildə yaradılmış Kral Salman Humanitar Yardım və Xilasetmə Mərkəzi (KSrelief) oynayır. Mərkəz fəaliyyətə başladığı vaxtdan 113 ölkədə 4 457 humanitar layihə həyata keçirib və bu layihələrə 8 milyard dollardan çox vəsait ayrılıb.
KSrelief-in həyata keçirdiyi ixtisaslaşmış proqramlar arasında siam əkizlərinin ayrılması üzrə Səudiyyə proqramı da yer alır. Proqram çərçivəsində 28 ölkədən 158 siam əkizi ilə bağlı tibbi qiymətləndirmə aparılıb və beş qitədən uşaqların iştirak etdiyi 72 əməliyyat uğurla həyata keçirilib. BMT 2024-cü ildə Səudiyyə Ərəbistanının təşəbbüsü ilə 24 noyabrı Ümumdünya Siam Əkizləri Günü elan edib.
Səudiyyə Ərəbistanının Xarici Könüllülük Platforması vasitəsilə isə 59 ölkədə 1 446 tibbi və təlim missiyasında 84 388 könüllü iştirak edib. Bu missiyalardan 2,85 milyondan çox insan yararlanıb, 273 350 cərrahi əməliyyat həyata keçirilib. Elektron ianə platforması “Sahem”də isə 9,82 milyondan çox donor tərəfindən 1,701 milyard Səudiyyə riyalından çox vəsait toplanıb.
Humanitar yardım əməliyyatları Yəmən, Qəzza, Sudan və Suriyada da davam etdirilir. Yəməndə son günlər Şəbva, Əl-Cövf və Əbyan əyalətlərində minlərlə ərzaq səbəti paylanıb, Təizdə isə 12 min qutu xurmanın bölüşdürülməsi layihəsinin ikinci mərhələsinə başlanılıb.
Qəzza zolağında KSrelief-in mərkəzi mətbəxi çərşənbə günü mərkəzi və cənub bölgələrində ehtiyacı olan insanlara 24 850 isti yemək paylayıb. Bundan əlavə, humanitar yardım çərçivəsində müxtəlif bölgələrə 500 min litr içməli su çatdırılıb. Sudanın Şimali Kordofan əyalətində məcburi köçkünlər və geri qayıdanlar üçün 1 050 ərzaq səbəti, Suriyanın Dəməşq ətrafında isə həssas ailələr üçün 506 ərzaq səbəti paylanıb.
