Səudiyyə Ərəbistanına səyahət və əyləncə məqsədilə gələn xarici turistlərin sayının 2025–2030-cu illər arasında 93 faiz artacağı proqnozlaşdırılır ki, bu da Yaxın Şərq üzrə gözlənilən 64 faizlik və qlobal miqyasda nəzərdə tutulan 30 faizlik artım templərini xeyli qabaqlayır.
Gecələmələrin sayına əsaslanan bu proqnoz "Oxford Economics" şirkətinə daxil olan "Tourism Economics" tərəfindən "WTM Spotlight Riyadh" tədbirində təqdim edilmiş hesabatda yer alıb.
Hesabata əsasən, 2019-cu ildən 2025-ci ilə qədər Krallığa xaricdən edilən səfərlər 67 faiz artıb; eyni dövrdə bu göstərici Yaxın Şərq üzrə 20 faiz, qlobal miqyasda isə cəmi 5 faiz təşkil edib.
Qlobal artımın əsas hərəkətverici qüvvəsi
Sözügedən dövr ərzində Krallıq region üzrə beynəlxalq səyahət artımının təxminən dörddə üç hissəsini təmin edib və 2019-cu ildən bəri dünyadakı səyahət artımının təxminən 15 faizini öz üzərinə götürüb.
"Səudiyyə Ərəbistanı dünyanın ən dinamik qonaq iqtisadiyyatlarından biri kimi sürətlə ön plana çıxıb".-deyə, "Tourism Economics" şirkətinin Avropa, Yaxın Şərq və Afrika üzrə idarəedici direktoru Deyv Qudqer qeyd edib.
O əlavə edib ki, xarici qonaqlar hazırda Krallıqda keçirilən bütün gecələmələrin təxminən yarısını təşkil edir və bu da turizmin getdikcə xarici tələbatın daha mühüm mənbəyinə çevrildiyini göstərir.
Xarici qonaqların xərcləmələrində səyahət və gəzinti məqsədilə gələnlərin payı 2019-cu ildəki 9 faizdən 2025-ci ildə 28 faizə yüksəlib və 2030-cu ilə qədər 31 faizə çatacağı gözlənilir.
Bu proqnoz Səudiyyə Ərəbistanının ümumi turizm sektorunda davam edən böyümənin ardınca gəlir. Turizm Nazirliyinin illik statistik hesabatına görə, Krallıq 2025-ci ildə əvvəlki illə müqayisədə təxminən 6 faiz artımla ümumilikdə 123 milyon daxili və xarici turist qəbul edib, onların ümumi xərcləmələri isə rekord həddə - 304 milyard Səudiyyə riyalına çatıb.
Ümumi saya 176,6 milyard riyal xərcləyən 29,3 milyon xarici turist daxil olub. Rəsmi "DataSaudi" statistikası göstərir ki, il ərzində gələn xarici turistlərin 7 milyonunu, yəni 24,1 faizini sırf əyləncə və istirahət üçün səyahət edənlər təşkil edib.
"Tumodo" səyahət platformasının Körfəz regionu üzrə rəhbəri Mühənnəd Nəda növbəti mərhələnin daha çox vəsait xərcləyən imkanlı turistlərin cəlb edilməsinə və onların səfər müddətinin uzadılmasına yönəlməli olduğunu bildirib.
"Səudiyyə Ərəbistanı artıq beynəlxalq səviyyədə böyük səyahət tələbatı yarada bildiyini sübut edib. Növbəti mərhələ isə diqqəti daha çox gəlir gətirən səyahətçilərə yönəltməkdən, eləcə də ölkədə qalma müddətini və hər bir qonağın xərclədiyi məbləği artırmaqdan ibarətdir", - deyə Nəda "Arab News"a bildirib.
O qeyd edib ki, Qırmızı dəniz və Əl-Ula kimi istiqamətlərə birbaşa beynəlxalq uçuşların açılması, ölkədaxili nəqliyyat əlaqələrinin asanlaşdırılması və daha geniş çeşiddə qalma yerlərinin təqdim olunması bir neçə şəhəri əhatə edən turların təşkilinə kömək edəcək. Mədəniyyət, macəra, sağlamlıq, qastronomiya və əyləncənin vahid səyahət marşrutlarında birləşdirilməsi də xarici qonaqların ölkədə daha uzun müddət qalmasını təmin edə bilər.
Çin bazarı və hotel sektorunun gələcəyi
"WTM" hesabatında qeyd olunur ki, "Dragon Trail International" tərəfindən aparılan ayrıca araşdırmaya görə, sorğuda iştirak edən Çin turizm agentliklərinin 52 faizi artıq Səudiyyə Ərəbistanına turlar satır, 32 faizi isə Krallığı çinli turistlər üçün ən böyük potensiala malik marşrutlardan biri hesab edir.
Sorğuda iştirak edən agentliklərin 42 faizi yüksək gəlirli və lüks səyahət həvəskarlarını Yaxın Şərq və Şimali Afrikada ən sürətlə bərpa olunan və böyüyən təbəqə kimi göstərib.
Rəyi soruşulanların 54 faizi təbiət və mənzərələrin müştəriləri üçün xüsusilə cəlbedici olduğunu bildirib; bunun ardınca 45 faizlə macəra və açıq hava fəaliyyətləri gəlir.
Səudiyyə Ərəbistanının mehmanxana sektorunun da bu artan tələbatdan böyük gəlir əldə edəcəyi gözlənilir. "STR" şirkətinin proqnozuna əsasən, biznes və konsaltinq sahəsində bərpa olunan tələbatın yeni hotel təklifini üstələməsi nəticəsində 2027-ci ildə Ər-Riyadda mövcud otaq başına düşən gəlir (RevPAR) 18,6 faiz artacaq.
Ciddə şəhərində isə 2027-ci ildə 2300-dən çox yeni hotel otağının istifadəyə verilməsi gözlənilir; daxili və xarici tələbat, o cümlədən Həcc və Ümrə ziyarətləri ilə bağlı səyahətlər bazarı dəstəkləməkdə davam edəcək.
