Yəmən Prezident Rəhbərlik Şurasının sədri Rəşad əl-Əlimi İranın husilərə Bab əl-Məndəb boğazı və Qırmızı dəniz üzərində təsir imkanları qazandırmağa çalışdığını bildirib.
ArabAZ xəbər verir ki, əl-Əlimi Bab əl-Məndəb yaxınlığında hərbi vəziyyəti dəyişdirmək cəhdlərinin yalnız Yəmənin daxili məsələsi kimi qiymətləndirilə bilməyəcəyini vurğulayıb.
Onun sözlərinə görə, Bab əl-Məndəb boğazına yönələn istənilən təhlükə birbaşa Qırmızı dənizə, Süveyş kanalına və dünya ticarətinə təsir göstərir.
Əl-Əlimi bildirib ki, Yəmən sahillərinin qorunması, ölkənin quru əraziləri və ərazi suları üzərində dövlət nəzarətinin bərpası beynəlxalq ictimaiyyətin ortaq maraqlarına cavab verir.
O, Bab əl-Məndəbin dünya ticarəti baxımından strateji əhəmiyyətini nəzərə alaraq bölgədə baş verən hərbi dəyişikliklərin beynəlxalq səviyyədə diqqətdə saxlanılmasının vacibliyini vurğulayıb.
