Yəmənin beynəlxalq səviyyədə tanınmış hökuməti Səudiyyə Ərəbistanının Şərq-Qərb neft kəmərinə pilotsuz uçuş aparatları ilə həyata keçirilən hücumu kəskin şəkildə pisləyib. Yəmən Xarici İşlər Nazirliyi hücumda istifadə olunan pilotsuz uçuş aparatlarının İraq ərazisindən buraxıldığını bildirib.
ArabAZ xəbər verir ki, nazirliyin bəyanatında hücum nəticəsində insan tələfatı və maddi ziyanın olduğu qeyd edilib. Hadisə Səudiyyə Ərəbistanının suverenliyinin və beynəlxalq hüququn “kobud şəkildə pozulması” kimi qiymətləndirilib.
Yəmən tərəfi hücumun eyni zamanda regional təhlükəsizlik və enerji təchizatı üçün ciddi təhdid yaratdığını vurğulayıb.
Nazirlik Yəmənin Səudiyyə Ərəbistanı ilə “tam həmrəyliyini” ifadə edərək Ər-Riyadın təhlükəsizliyini, suverenliyini və ərazi bütövlüyünü qorumaq üçün gördüyü tədbirləri dəstəklədiyini açıqlayıb.
Bəyanatda İraq ərazisindən yeni hücumların həyata keçirilməsinin qarşısını almaq üçün “təsirli addımların” atılmasına çağırış edilib.
Yəmən hökuməti həmçinin Səudiyyə Ərəbistanının Bağdada bu cür hücumların qarşısını almaq üçün tədbirlər görmək imkanı vermək qərarını müsbət qiymətləndirib.
