İran və Oman Hörmüz boğazından gəmilərin təhlükəsiz keçidi ilə bağlı apardıqları məsləhətləşmələrin nəticələrini bazar ertəsi keçirilməsi gözlənilən regional görüşdə Körfəz ölkələrinin nümayəndələrinə təqdim edəcəklər. Bu barədə İran Xarici İşlər Nazirliyinin sözçüsü İsmayıl Bəqai bildirib.
ArabAZ xəbər verir ki, Bəqai açıqlamasında görüşdə İran və İraqla yanaşı, Körfəz ölkələrinin xarici işlər nazirlərinin də iştirak edəcəyinə ümid etdiklərini söyləyib.
“Gündəliyin bir hissəsi olaraq nümayəndə heyətlərinə İran və Oman arasında Hörmüz boğazından gəmilərin təhlükəsiz keçidi ilə bağlı aparılan məsləhətləşmələrin nəticələri barədə məlumat verəcəyik”, – Bəqayi bildirib.
Onun sözlərinə görə, İran və Oman Hörmüz boğazının iki sahilyanı dövləti kimi bu məsləhətləşmələri həyata keçirib və əldə olunan nəticələri regionun digər ölkələri ilə bölüşmək niyyətindədir.
Bəqai Tehranın regional təhlükəsizliyin kənar qüvvələrin müdaxiləsi olmadan region ölkələrinin özləri tərəfindən təmin edilməli olduğu mövqeyində qaldığını vurğulayıb.
“Qonşular olaraq bir-birimizlə danışmalı, qarşılıqlı etimad yaratmalı və regiondakı bütün ölkələrin iradəsinə və ortaq maraqlarına əsaslanan təhlükəsizlik sistemi qurmalıyıq”, – İran XİN sözçüsü əlavə edib.
